Komisaria Komisaun Funsaun Publika, Anita Tavares Oliveira de Jesus informa, bazeia ba dadus ne’ebé iha, Funsionariu Públiku ne’ebé tama ona idade reforma hamutuk rihun 40.
Ho nune’e, KFP halo koordenasaun ho Institutu Nasionál Seguransa Sosiál (INSS) no Ministériu Finansa hodi haree prosesu funsionáriu públiku ho idade reformadu. Tanba bainhira implementa INSS mak sei halo prosesu hotu ligadu ho pagamentu.
“Tanba funsionáriu ida reforma nia direitu sei ba iha (INSS) ne'ebá. Nune'e tinan oin ita hahú implementa lei obrigatóriu reforma ne'e, ne'ebé hahú ho idade 65 ba leten," informa Anita, iha Timor Plaza, Tersa (11/03).
Enkuantu, Prezidente KFP, Agostinho Letêncio de Deus informa, forsa traballu iha kontestu funsaun públika ba tinan 2023 nian, tuir dadus atualizasaun iha baze SIGAP-KFP rejista funsionáriu permanente na’in 33.004 no ajente administrasaun públika na’in 6.376, ne’ebé soma hamutuk iha na’in 39.380, kompostu husi feto na’in 14.115 no mane 25.265.
Husi total númeru ne’e, nia Agustinho dehan, na’in 4.752 mak nia idade liu ona tinan 60 to’o 89.
Entretantu, Prezidente INSS, Arlindo Pinto hatete, INSS hein dadus funsionáriu reformadu husi KFP nune'e bele halo pagamentu.
"Funsionáriu reformadu to'o agora ita seidauk hetan dadus husi nível Ministériu sira ne'ebé mak ninia funsionáriu sira atu reforma, mais husi parte seguransa sosiál prontu atu bele halo pagamentu no atendimentu ba funsionáriu sira neʼebé mak atu reforma,” Arlindo dehan.
