Ministru Asuntus Kombatentes Libertasaun Nasionál, Gil da Costa Monteiro “Oan-Soro” hatete, iha ema balun no líder sira balun iha Rejiaun Administrativu Espesiál Oé-kusse Ambeno no iha territóriu ne'e tomak, agora komesa ba kaer ona asuntu veteranus hodi politiza.
“Iha ema balun no líder sira balun no grupu balun iha Oé-kuse, iha teritóriu tomak agora komesa lori assuntu veteranus hodi polítiza ba iha komunidade sira. Ne'ebé atu apela deit liu husi ita bo'ot sira nia kobertura ne'e, husu ba sira hotu-hotu lalika polítiza asuntu veteranus,” Dehan Ministru Oan Soru ba Jornalista, sira hafoin partisipa iha Konsellu Ministru, Kuarta(12/03).
Nia dehan, Ministru Asuntu Kombante Libertasaun Nasionál ne'e husi partidu CNRT, maibé la politiza asuntu veteranu.
“Ministru ida naran Gil da Costa Monteiro “Oan Soru” ne'e nian ema partidu CNRT, mais nian la halo servisu ne'e ba nian partidu, ne'ebé husu ba hot-hotu, liu-liu veteranu sira lalika rona ema grupu ida-idak ba tama iha uma tau atributu oi-oin hodi ba politiza ema, balun dehan hanesan ne'e, liga ho asuntu veteran,” Nia informa.
Tanba ne’e, Ministériu Asuntu Kombante Libertasaun Nasionál nia pozisaun ne'e klaru hela, iha artigu 35, estatutu kombatente da Libertasaun Nasionál númeru 1.
“Hatete iha ne'ebá dehan konsellu kombatente da Libertasaun Nasionál maka uniku orgaun ne'ebé reprezenta interese hotu-hotu veteranus nian. Ne'ebé veteranus ne'e nian, atu partidu FRETELIN, CNRT, PD no partidu saida de'it, maibé asuntu veteranus ne'e la partidariza ba iha komunidade nia leet,” Nia relata.
Tanba ne'e, husu ba Partidu Polítiku sira, atu labele politiza assuntu veteranus ba iha populasaun sira iha teritóriu nasionál.
“Ida ne'e liga ho partidu polítika sira hahú mobiliza malu hodi polítiza asuntu veteranus ba iha komunidade sira, iha grupu ho partidu polítiku balun dehan, sira ne'ebé hamutuk ho atuál Primeiru-Ministru, Kay Rala Xanana ne'e, fa’an tiha ona Naktuka, maibé hakarak informa ba públiku katak, PM Xanana hakarak fa’an karik uluk faan Timor tomak de'it, karik Timor la ukun aan, tanba ne'e husu ba públiku, atu la bele monu ba iha grupu sira nian lansu sira,” Nia konklui.
