Ministra Solidariedade Sosiál no Inkluzaun Verónica das Dores hatete, pagamentu ba benifisiariu pensaun sosial sira ba faze dahuluk hamutuk na’in 107.786, ne'ebe sei hala'o iha loron 17 fulan-Marsu, sei selu tuir kada rejiaun.
“Parte Leste sei hahú husi Munisipiu Lautem, rai klaran sei hahú husi Munisipiu Covalima, Oeste sei hahú husi Munisipiu Ermera no RAEOA ho Dili sei hahú mós husi data refere,” dehan Ministra Veronica liu husi konferénsia imprensa, Iha Salaun MSSI Kaikoli, kinta ne’e (13/03).
Governante ne’e esplika, benefisiariu ne'ebé atu simu sira nia direitu pensaun, tuir kategoria ida-idak.
Sira ne’ebé ho idade 60-69 hamutuk na'in 45.885 kada fulan sei hetan osan $60, idade husi 70-79 hamutuk na'in 44.121 sei hetan $80 kada fulan no idade husi 80 ba leten sei hetan dolar $100.
Ministra Veronica akresenta, pagamentu ba benefisiariu faze dahuluk iha tinan ne'e, sei inklui mós pagamentu retrotivu ba munisipiu neen ne'ebé lakonsege halo pagamentu iha faze da haat, tinan 2024.
Munispiu neen ne'ebé benefisirariu seidauk simu sira nia pensaun iha tinan 2024 mak husi Munispiu Lautem, Baukau, Ermera, Bobonaro, Kovalima no Likisa.
Tanba ne'e, Ministra Solidariedade Sosiál husu ba autoridade kompetente sira hanesan xefe suku no xefe aldeia atu informa ba benefisiariu sira ne'ebé seidauk iha konta bankaria hodi hakbesik an ba banku komersial hodi loke konta bankaria.
Iha fatin hanesan, Presidente Konsellu Administrasaun BNCTL, Januario Gama, hatete, dadus benefisiariu ne'ebé nesesáriu sei responsavel husi MSSI no INSS, enkuantu ba prosesu pagamentu sei responsavel husi BNCTL.
Tanba ne'e, BNCTL enkoraja benefisiariu sira atu hotu-hotu iha konta bankaria hodi bele hamenus forma iha ATM.
"BNCTL enkoraja ba benefisiariu sira, di'ak liu hotu-hotu iha konta bankaria no bele minimiza liu tan ba forma iha ATM, hodi bele fasilita pagamentu ne'e ho lais no labele iha impedementu pagamentu ne'ebé ita sei realiza iha kalendariu ne'ebé ita estabelese tiha ona,”dehan Januario Gama.
Prezidente Konsellu BNCTL ne’e hatutan, pagamentu ba benefisiariu sira iha faze dahuluk tinan 2025 no ho retrotivu nian sei halo iha tempu ne'ebé hanesan.
Tanba ne'e BNCTL sei esforsu hodi halo mobilizasaun rekursu hodi halo pagamentu ba benefisiariu sira iha teritoriu laran tomak, no BNCTL garante benifisiariu sira sei hetan hotu sira nia direitu tuir orariu ne'ebé determina ona.
