Profesor YAMADA Mitsuru hato’o asuntu ne’e, hafoin hamutuk ho nia estudante na’in rua hasoru malu ho Xefe Governu iha Palásiu Governu, kinta (13/03).
YAMADA Mitsuru lori nia estudante sira no durante enkontru ho Primeiru Ministru fó lisaun istóriku ba sira kona ba saida mak importante husi mundu ne'ebé hakmatek.
“Primeiru Ministru esplika detallu kona ba importánsia husi rekonsiliasaun, katak laiha funu, laiha konflitu iha mundu. Ha'u ho ha’u nia estudante sira impresionadu tebes atu hatene no rona ida ne'e,” dehan Profesor liu husi komunikadu ne’ebé Online INDEPENDENTE asesu iha Pájina ofisiál Primeiru-Ministru Kay Rala Xanana Gusmão, Kinta (13/03).
Komunikadu ne’e haktuir, Professor ne’e mós vizita ona Timor-Leste iha tinan kotuk, tanba hakarak atu estabelese Sentru Estudu Japonés nian iha Universidade Nasionál Timor Lorosa’e (UNTL) ne'ebé oras-ne’e daudaun hahú ona.
Iha oportunidade ne’e, nia agradese ba Primeiru Ministru ne’ebé ajuda tebes, fó asisténsia ba estabelesimentu projetu ida ne’e iha Timor-Leste.
Xefe Governu husik hela mensajen katak, buat ne’ebé importante liu mak sentidu solidariedade husi Timor-Leste ho Japaun tanba Xanana Gusmão hanesan líder ida ne’ebé iha belun barak ho ema Japonés.
YAMADA Mitsuru nu’udár Professor iha Instituisaun Ensinu Superiór Partikulár Japaun nian ida ne’ebé lokaliza iha sidade Tokyo ho naran Universidade WASEDA.
