Sekretáriu Estadu Arte no Kultura SEAK, Jorge Soares Cristovão hatete, antes fim Dezembru tinan ne'e prosesu tenderizasaun remata no sei asina kontratu ho kompañia vensedor ba konstrusaun ne'e iha tinan oin.
"Objetivu husi enkontru ohin ne'e ita hanaran stireng comite ne'ebé ami diskuti hela prosesu konstrusaun ba Biblioteka Nasional ne'ebé mak iha tempu badak sei realiza nia prosesu tenderizasaun. Objetivu prinsipal liu maka ita atu koalia kona-ba fandli angraben ida ne'ebé mak entre ENI ho ANP no realiza Memorandum of Understanding (MoU) Ida ne'ebé entre Governu liuhusi SEAK, hamutuk ho ANP. Tanba ne'e maka ohin ita hetan ona nia solusaun. Atu hatete ba ita boot sira, iha tinan ida ne'e nia laran antes fim de Dezembru prosesu tenderizasaun ne'e sei remata, no sei asina kontratu ho menan nain sira ne'ebé maka atu halo konstrusaun no ita sei realiza asina kontratu ida ne'e iha tinan oin", dehan SEAK, iha salaun MJDAK, Lecidere, sesta(13/09)
Nia hatutan, dezeñu kuaze laiha mudansa, maibe hare'e rai ne'ebé maka iha fatin konstrusaun ba Biblioteka nian Governu hakarak hasae hanesan tiha ho Edifísiu ADN nian ne'ebé mak iha oin.
"Tanba antes liu nia tun fali mai kraik uituan, maibe tekniku sira ajusta atu halo hanesan tiha, tanba ne'e maka nia iha mudansa uituan, ho orsamentu tanba ne'e mak ohin ita diskute hodi aprova ida ne'e. Atu hatete deit katak, Orsamentu ba konstrusaun Biblioteka ne'e 10 Milhoens mai husi ENI, depois de prosesu ne'e lao ursida adisional ne'ebé aumenta atu finaliza ne'e mak parte Governu liu husi SEAK no MJDAK sei hatama husi ne'eba. Husi Governu sei ba ho 3.5 Milhoens, hamutuk ho orsamentu ne'ebé mai husi ENI 13.5 Milhoens", tenik SEAK.
Prezidente Autoridade Nasionál Petroleu (ANP), Gualdino do Carmo da Silva, hatete, iha ona konkordánsia husi Governu atu jere prosesu tendereizasaun ne'e iha futuru.
"Ami iha konkordansia ne'ebé iha husi parte hotu fó fiar ba ANP atu jere admnistra prosesu tenderizasaun ne'e hotu nune'e mos implementasaun iha futuru, nafatin iha ekipa konjunta husi estering comite, ne'ebé foti desizaun mais alto no fo orientasaun depois iha mos ekipa konjunta iha nível tekniku atu hare'e ba implementasaun tomak, hahu husi prosesu tenderizasaun too kedas iha monitorizasaun ba konstrusaun ninian", nia dehan.
Nia hatutan, ekipa nafatin servisu hamutuk kompañia manán nain ne'ebé mak sei sai vensedor.
"Ita adopta kriteria hotu ne'ebé iha atu kompañia sira kompete no mos ita iha konsultasaun ne'ebé rigorozu tebes ho CNA nomós MOP, atu nune'e tuir hotu padroens ne'ebé vigora ona iha ita-nia rain, atu nune'e fó sai karik bele reprezenta hotu ona padroens ne'ebé mak vigora ona," nia tenik.
