Prezidente TIMOR GAP, Rui Soares hatete, liuhosi akordu ne’e, TIMOR GAP sai parseiru foun hodi hamutuk ho kompaña sira seluk iha projetu Bayu-Undan.
Nia dehan, tuir akordu iha projetu Bayu-Undan ho TIMOR GAP joint ho kompaña internasionál sei hetan interese partisipativu pursentu 16, no parseiru sira seluk hanesan santos ne’ebé sai operador ho pursentu 36.5, SK E&S pursentu 21, INPEX pursentu 9.6, ENI pursentu 9.2 no Tokyo Resources pursentu 7.7.
“Ohin asina dokumentu ida bolu naran Sale and Purchase Deed hatudu katak interasaun entre TIMOR GAP hanesan parseiru foun hodi tama ba parseria sira ne’ebé eziste ona iha Bayu-Undan, Bayu-Undan ne’e Kompanha mak Santos no kompañia lubuk ida hanesan, SK E&S, INPEX, ENI no Tokyo Resources, no TIMOR GAP sei tama ho persentajen pursentu 16,” dehan Prezidente iha Salaun City 8 Manleuana, Segunda (16/09).
Nia hatutan, TIMOR GAP,EP sei hamutuk ho paseiru sira husi kompaña ne’ebé hola parte iha projetu Bayu-Undan hodi tau matan ba produsaun Bayu-Undan atu kontinua la’o.
Ministru Petroleu no Rekursu Minerais, Francisco da Costa Monteiru hatete, join venture Bayu-Udan eziste ona durante tinan 24 nia laran maibé seidauk iha kompaña nasionál ida mak hola parte iha projetu refere tanba hahú inisiu kompaña nasionál mak la iha duni.
Maibé hahú iha tinan 2012 governu iha ona aspirasaun ida katak neneik no bebeik kompaña nasionál ida sei partisipa iha esplorasaun rikusoin sira iha Timor.
“Seremonia ne’e atu komfirma TIMOR GAP nia iha Bayu-Undan Join Venture ne’ebé hanesan sosio ida ne’ebé durante ne’e hala’o servisu iha Bayu-Undan no durante tinan barak liu 24 ona ita-nia kompaña nasionál la iha laran,” dehan Ministru.
Ministru afirma, hanesan hotu-hotu hatene katak hahú inisiu kompaña nasionál seidauk iha, maibé dezde tinan 2012, Timor-Leste iha aspirasaun katak neneik no bebeik kompaña nasionál sira sei tama iha esplorasaun rikusoin Timor nian.
Entretantu, iha akordu ne’e, TIMOR GAP nia papél nu’udar kompaña nasionál mina-rai no gás Timor-Leste nian, tan ne’e liuhosi integrasaun patrimóniu produsaun ida ne’e iha nian portfólio, TIMOR GAP hametin nia pozisaun iha setór enerjia ho haluan nia espasu oprasionál.
Tuir pedidu, TIMOR GAP nian ba iha Governu liuhosi Autoridade Nasionál Petroleu Minerais joint iha projetu Bayu-Undan ba periodu estensaun ba tinan rua tan.