Tuir komunikadu ne’ebé online INDEPENDENTE sita katak, Konferensia Episkopal Timorense, husi susesu vizitasaun Papa Francisco nia, Bispo sira husi Dioseze tolu orgullu ho nenen ksolok felesita povu Timor-Leste tanba hatudu ona hahalok oin na’in hamnasa midar, simu ho neon ho laran São Pedro nia saseluk hodi akompaña ninia hakat sira to’o rohan.
“Ba partisipasaun ida maka'as nune'e, soi duni hahí no agradece rohan laek, ksolok ne’ebé ita koko durante loron tolu ne'e nia laran mai husi ema wa'in nia laran luak no sakrifisiu sukat laek. Dadolin ida husi tasi-mane hateten "La mesa-mesak sirit ai-tehen, hodi malu ho malu sirit ai-tehen". Katak, mesa-mesak ita la bele, hamutuk ita bele,” dehan Komunikadu ne’ebé online INDEPENDENTE asesu, (16/09).
Tuir komunikadu ne’e, Santo Padre nia prezensa nu’udar aman fi’ar nian loke pajína foun id aba povu tomak nia istória ne’ebé sei hela ba nafatin iha Timoroan hotu nia fuan.
Sua Santidade nia lia-menon sira fó roman foun ba na'i ulun sira Nasaun no Kreda nian, nune'e mós ba Timoroan hotu nu’udar sidadaun no sarani katólika atu hateke orizonte foun moris nian nakonu ho optimismo, ksolok no esperansa.
“Amu Papa nia liafuan murak katak "Timor-Leste nia riku-soin boot liu mak ninia povo", sai hanesan lia-bolu ida ba ukun-na'in sira atu tane as povo nia dignidade no interesse. Basá, povo ne'e, uluk-nanain povo Maromak nian. Demokrasia hetan nia abut no valor wainhira ukun na'in sira hala'o nia knár nu’udar misaun ida husi Maromak atu tau matan ba Nia povo,” sita Komunikandu.
Papa Francisco hatete, povo Timor nudar povo ida simples, oin-midar, familiar, no nakonu ho ksolok. Timor-Leste ne'e furak tanba iha labarik kikoan barak, tadan malalek moris nian. Foin-sa'e sira nebe barak tebes ne'e, presente ida, Dom ida no sinal esperansa Kreda no nasaun nian.
Santo Padre fó sentido foun ba símbolo importante rua kultura Timor nian: Kaibauk no Belak ne’ebé hatudu kbiit aman nian no laran-kmaus inan nian. Instrumento kulturál rua ne'e Amu Papa haré nu’udar Maromak nia kbiit ukun nian iha domin no laran sadía.
"Imi mak Cristo nia mina-morin". Liafuan hirak ne'e mak Santo Padre hato'o iha sorumutu ho ami Bispo, nailulik, religiozo, religioza no ajente pastorál sira. Ami Bispo sira hakarak hatutan mos Santo Padre nia lia-menon atu ita moris tuir no halekar Evangelho nia morin,” salienta tan.
Tuir komunikandu, Santo Padre husu ba foinsa'e sira atu keta haluha memória ferik ho katuas sira nian liu- liu, ema hirak nebe saran sira nia moris hodi hari nasaun TL. Amo Papa mos husu atu foinsa'e sira mehi aas, laran manas iha fiar, sai ema livre, komprometidu no moris nudar maun-alin.
Livre, katak sai ema nebe responsável, no hatene hadook-aan husi toman aat sira. Comprometido hodi tane aas ita nia história nebe nakonu ho fiar, heroísmo, martírio no reconciliação. Kona ba moris nudar maun-alin nian, Amu Papa dehan diferensa mak dalan atu aprende respeita malu. "Diferença sim, ódio não", katak, ita-nia hanoin la hanesan la bele halo ita rai kunan ba malu.
Tan ne'e, Bispo sira husi Dioseze tolu, ho fuan no laran nebe kle'an liu, hakarak hato'o agradesimentu ne’ebé boot tebes bá, Prezidente da Republica Jose Ramos Horta, Primeiru Ministru Xanana Gusmão ho membros IX Governo Konstitusionál, Komisaun Altu Nível Preparasaun Visita Santo Padre nian ho nia komponente sira, Presidente Autoridade Municipal sira ho sira nia elemento sira, ADN no equipa logística.
Kontejensia Pombo Mutin, Eskoltu sira no Polísia Tránzito, grupo kategoriál sira Igreja nian, voluntáriu, koru, Técnico EDTL, Pároku sira, Religiozo sira ho Ministro extraordinário ba komunga nian, Brigada saúde no bombeiros, Artista sira.
Grupo sira saneamento nian, Pax no Partisipa Câmara Comércio e Indústria (CCI-TL), Brigada Saúde no Cruz Vermelha, Grupo Lia Na'in sira, Média Nasionál ho Internasionál sira, Administrasaun no navegasaun Aérea de Timor-Leste, kompaña Aero Dili Benfeitor sira, Foin-sa'e, Na'ilulik, diácono, madre, irmão, seminarista, maun-alin no bin-feton sira no ema hotu nebé iha hakaran di'ak.