Tuir Vise Reitór ba Asuntu Akademiku no ba Garantia Kualidade, Samuel Venáncio de Sousa Freitas hatete, iha loron 21 fulan-Novembru tinan 2023, nia haruka ona karta ba MESSK, husu atu iha tinan ida ne’e sei simu estudante foun hamutuk 4.720.
"Ami deside no aprova liu husi konsellu jerál iha loron 6 fulan novembru tinan kotuk no dia 21 Novembru mak ami haruka ba Ministériu Ensinu Superiór ho total 4.720 vaga ne'ebé kategoria ba rejime espesial 30% no rejime jeral 70%", dehan iha nia kna'ar fatin, kampus Sentrál UNTL, sesta ne’e (05/01).
Nia dehan, Universidade Nasionál Timor Lorosa’e (UNTL) kada tinan simu nafatin estudante ne'ebé termina ona sira nia estudu iha Ensinu Sekundária Jerál no Ensinu Tékniku Vokasionál sira iha teritóriu tomak.
Nia mós hateten, tinan ne'e diferente ho tinan kotuk, tanba sira haree no hatene antes ona sira nia valór, tanba ne'e atu eskola área sira ne'ebé sira hakarak presiza haree mós sira-nia valór ne'ebé tenke priense rekézitus ne'ebé iha.
Nia subliña tan, bainhira Konsellu Jerál aprova númeru hirak ne'e, sei iha tan departamentu foun rua (2) mak hanesan Floresta no Sosiologia ne'ebé hetan autorizasaun atu la’o, nune'e vagas ne’e sei fó kada departamentu sei iha vaga 100.
"Ha'u hetan konvite ida iha segunda feira dia 8 de janeiru sei halo serimónia abertura ba koresaun ezame ba kandidatus rejime espesiál iha ministériu, no koresaun ne'e hahú iha inísiu de Janeiru sé posível ita bele publika iha janeiru ne'e, kuandu lae bele iha Fevereiru,”hakotu nia.
