Tan ne’e, iha Ensinu Báziku Filial (EBF) Osso-Uaque iha ano letivu 2024 hela manorin na’in ida de’it mak sei hanorin estudante sira, tanba restu ne’e kontratu remata ona.

Eis Koordenadór Anacleto Germano Pereira de Carvalho hatete, sira kumpri desizaun husi Minístra, tan ne’e sira labele hanorin tan estudante sira iha tinan 2024 nian, tanba sira nian kontratu remata ona.

Ho nune’e, nia hatutan, sira hein deit to’o bainhira Ministériu Edukasaun foti desizaun ba sira-nia estatutu mak foin hanorin fali.

“Ami sei la hanorin tan estudante sira tanba antes ne’e Minístra Edukasaun ninia deklarasaun fó sai ona katak profesór kontratadu ne’ebé kontratu remata iha loron 31 Dezembro tinan 2023 sei labele hamriik tan iha estudante nia oin hodi hanorin estudante sira bainhira seidauk iha desizaun,” dehan Eis Koordenadór ba Online INDEPENDENTE Online liu husi Via telefone, Kinta (04/01).

Eis Koordenadór haktuir katak, antes ne’e sira mós fó sai ona informasaun iha média sosiál liu husi Facebook katak, eskola refere sei segel ka provizoriomente taka lai, tanba iha EBF Osso-Uaque maioria profesór kontratadu.

Maibé nia dehan, liu husi publikasaun refere dirijente husi Ministériu Edukasaun no Diretór Servísu Eduksaun Munisípiu Baukau ba halo ona konfirmasaun no foti dadus eskola hodi sei aprezenta iha Gabinete Ministra Edukasaun tan ne’e sira sei hein hela.

“Ohin ami hato’o ona ami-nia preokupasaun ba dirijente sira maibé sira mai hola de’it dadus hodi halo relatóriu no sei lori ba hato’o ba Minístra no nia Gabinete no nune’e ami sei hein ninia rezultadu,” dehan Eis Koordenadór

Tan ne’e kona-ba inskrisaun foun mós sira labele atende hotu tanba sira la iha ona direitu atu halo atividade eskola nian, no sira mós hatete sira mós lakohi atu halo servísu ne’e tanba orsida sira halo hotu servisu hirak ne’e, seluk mak simu fali osan.

Nune’e mós ba inskrisaun foun 2024 nian dadaun ne’e koordenadór eskola atuál de’it mak atende, tanba iha eskola refere iha profesór na’in hitu (7) kompostu husi profesór permanente na’in ida no kontratadu na’in neen (6).

“ami na’in neen ne’e profesór kontratadu hotu, no koordenadór ne’e mak funsionáriu permanente maibé foin dadauk iha Janeiru 2023 mak destaka fali mai iha ne’e  tan ne’e ami la bele simu halo servisu seluk hanesan inskrisaun ba estudante foun tanba ami-nia kontratu remata ona, orsida ami halo hotu tiha sira seluk mak simu osan fali.

Profesór Anacleto hamutuk profesór kontratatu sira seluk ne’ebé hanorin iha Ensinu Báziku Filial (EBF) Osso-Uaque sira mak sai hanesan mós fundadór ne’ebé harii eskola ne’e iha tinan 2019, maibé dadaun ne’e sira labele halo aktividade eskola nian tanba kontratu remata ona.

Entretantu, iha Eskola Bázika Filial Osso-Uaque total estudante hamutuk na’in 151, Profesor kontratadu na’in 6 no manorin permanente na’in ida.

Aliened, iha eskola refere total sala de aula hamutuk  6.

Enkuantu, relesiona ho asuntu ne’e, Online INDEPEDENTE tenta atu konfirma ho parte  Ministériu Edukasaun nian, maibé labele fó komentáriu tanba sira okupadu ho servisu seluk.