Tuir Xefe Sentru Saúde Postu Bobonaro, Domingos Mesquita da Silva hatete, ai-moruk ne'ebé mak atende kazu emerjénsia mak hanesan  Planning Tree, Diclofenac, no aimoruk esensiál sira hanesan Paracetamol, Amoxillin no Antibiótiku stock la iha.

“Agora dadaun ita-nia stock ai-moruk laiha hodi atende kazu emerjensia, tanbá ne'e difikulta tebes ba ita-nia pasiente sira, inklui profesionál saúde sira oinsá mak bele halo atendementu ba pasiente sira bainhira pasiente sira presiza tebes aimoruk," dehan nia liuhusi via telefone, kinta, (04/01).

Nia dehan, bainhira ai-moruk hodi atende emerjénsia laiha sira transfere pasiente sira ba hotu iha Ospitál Referál Maliana hodi halo tratamentu.

Nia hatutan, maske sira haruka ona karta pedidu ba iha Servisu Saúde Munisípiu Bobonaro, hodi submete ba iha Instituto Nasionál Farmácia no Produto Médico (INFPM), maibé to'o agora seidauk responde.

Entretantu, Diretór Servísu Saúde Munisípiu  Bobonaro, João Cardoso informa tan katak, ai-moruk esensiál item rua mak stock out iha Farmásia Saúde Munisípiu Bobonaro hahú husi inísiu Fulan Outubru ne'e.

“Ita iha item rua mak  stock out iha fulan Outubru nia laran, ida-nee mak Diclofenat no Dexametazone ba isin katar no bubu mak laiha, maibé sei iha ai-moruk seluk ne’ebé ita atu subtitui ho item ne'ebé falta, maske ai-moruk ne'ebé mak falta nia kandungan tunggal, maibé sei iha kombinasaun balun hodi subtitui," dehan nia.

Nia informa, Agora daudaun  hato'o ona pedidu online ba iha INFPM atu responde ai-moruk ne'ebé mak  mamuk, maibé seidauk responde.

Ho ida ne'e, sira nafatin hein resposta husi INFPM katak bainhira mak halo distribuisaun ai-moruk ba iha munisípiu hodi apoiu ba fasilidade saúde sira, atu nune'e fó tratamentu ba pasiente sira.