Ministru Justisa, Sergio Hornai hatete, nia parte haree daudauk ona fatin hodi estabelese Sentru Juvenil.
“Ha’u mós hakarak atu hateten katak ita tau importansia ba situasaun sira ne’e. Ita hakarak hanesan estadu no governu tau hanoin hamutuk aleinde politika lejislasaun sira, aumesmu tempu ita hakarak iha lei infra-estrutura par atu bele, bainhira situasaun sira hanesan ne’e mosu, sidadaun sira ne’ebé komete ita bele tau sira iha fatin propriu, fó formasaun komplementar hodi bele hadia sira-nia sira komportamentu,” dehan Ministru ne’e iha Hotel Timor, Segunda (03/06).
Daudauk ne’e, nia hatutan, prosesu aprovizionamentu lao hela.
“Tanba ita-boot sira hatene katak atu konstrui fatin ruma sei presiza liu husi prosesu aprovizionamentu no administrativu ida hodi haree fatin propriu. Presiza halo estudu sira, konsultante sira tenke halo nia servisu, servisu aprovizionamentu tenke lao, ikus bele halo kontrusaun, to’o ikus bele finaliza ba projetu ida, ne’e mak mekanismu ida tenke ser lao,” Ministru ne’e esplika.
Molok ne’e, Diretora Ezekutivu JSMP, Ana Paula Marcal hatete, lei la fó dalan duni ba Tribunal atu kondena labarik ho idade tinan 16 ba kraik.
Tan ne’e, tuir Ana, MJ bele haree ona ba kestaun ne’e no bele hanoin ona oinsa atu kria Sentru Juvenil ida ba labarik sira ne’ebé envolve iha krime no labele hetan kondenasaun husi Tribunal.
“Entaun Sentru Juvenil ne’e harii par atu muda joven menoridade sira ne’ebé mak komete krime, lori sira ba aprende iha ne’ebá hanesan edukasaun, formasaun, tanba dala-ruma mós inan-aman sira iha uma koalia sira la rona ona. Entaun ba iha ne’ebá ba atu hadia sira, haree ba iha gravidade husi sira-nia hahalok,” dehan Ana iha Timor Plaza, Tersa (28/05).
Iha sentru ne’e mak bele haree mós aspeitu psikolojia labarik sira ne’ebé envolve krime hodi bele hatene loloos motivu husi ninia envolvimentu ne’e.
“Ita mós tenke haree psikolojia labarik ne’e, envolve ba naok ne’e tanba sa? ransu mak sala ka tanba nia servisu duni mak ba naok ne’e ka keta nia hetan presaun husi ema seluk,” dehan Ana.
