Marciana ho Sofrimentu tinan 23 Featured

By Mariano Mendonca Juñu 04, 2024 866
Inan ida, Justina Ximenes, tuur ho nia oan Marciana Ximenes ho idade tinan 23, ne’ebé sofre difisiensia fízika desde kiik, iha Aldeia Vailana, Suku Lore I, Postu Administrativu Lore, Munisipíu Lautém, Sesta (31/05). FOTO: INDEPENDENTE/Mariano Mendonca. Inan ida, Justina Ximenes, tuur ho nia oan Marciana Ximenes ho idade tinan 23, ne’ebé sofre difisiensia fízika desde kiik, iha Aldeia Vailana, Suku Lore I, Postu Administrativu Lore, Munisipíu Lautém, Sesta (31/05). FOTO: INDEPENDENTE/Mariano Mendonca.

MARCIANA Ximenes, feto raan ida ne’ebé durante tinan 23 nia laran sofre defisiensia fiziku. Durante tinan naruk ne’e, Marciana nia moris depende maka’as tebes ba nia familia.

Marciana oan feto daruak husi Carlos Fernandes no Justina Ximenes ne’ebé moris iha 29 Marsu 1999 ne’e hahú sofre moras bainhira sira halai ba ailaran, hafoin loron Konsulta Popular, 30 Agostu.

Bainhira fila hikas mai villa, oan feto daruak husi maun-alin na’in lima ne’e nia kondisaun ladauk rekupera. Nia sofre isin-mana no estika an. Ho nune’e, nia inan-aman lori nia ba sentru saude Lospalos hodi hala’o tratamentu saude.

Tuir diagnostiku husi doutor, Marciana sofre moras malaria no afeita ba nia nune’e ikus mai nia sofre defisiensia fiziku.

Durante fulan hitu nia laran, Marcia halo tratamentu maibé laiha mudansa, ho nune’e nia inan-aman deside hodi fila hikas ba sira-nia hela fatin iha Aldeia Vailana, Suku Lore 1, Postu Administrativu Lore, Munisipiu Lautem.

"Nia hetan moras ida ne'e ami ba duni iha ospital, to'o iha ne’ebé (mediku) sira sona (aimoruk), maibé ami haree laiha mudansa. Osan mós laiha mak ami labele selu ona entaun ami deside fila mai uma,” dehan Justina iha nia hela fatin, Sesta (31/05).

Ho kondisaun defisiensia ne’e, Carlos Fernandes no Justina Ximenes, kontinua fó atensaun maka’as ba Marciana. Hatudu sira-nia domin ne’ebé boot ba sira-nia oan feto ne’e.

Durante tinan 23 nia laran, Carlos ho Justina, esforsu buka osan hodi sosa aimoruk no popok, no buka hahaan ba nia oan-feto ne’e.

"Ha'u mak fóhan nia loron no kalan, fó haris, troka. Kona-ba soe bee ne'e nia uza popok de’it, depois ami troka."

"Nia Apa koa tua mak ami faan hodi hetan osan ami ba hola foos no nia popok,” dehan Justina.

Maske nune’e, ho difikuldade finanseiru ne’ebé sira hetan, familia ne’e mós hein ema bele lolo netik liman hodi ajuda.

"Autoridade lokál sira mai duni iha ne'e maibé sira haruka ami halo nia Bilete Identidade (BI) no Eleitoral. Maibé ami labele lori ba tanba nia boot ona ami labele kous nia ba trata nia dokumentu, entaun ami deside husik nia la hetan buat ida," informa Justina.

Iha fatin hanesan, Carlos Fernandes hatete, tempu bailoron hahu husi fulan Jullu to'o Novembru nia koa tua no tein ba tua sabu hodi faan, no iha tempu udan nia buka nu’u maran hodi faan.

Ba kondisaun husi nia oan feto ne’e, Carlos dehan, nu'udar aman nia labele rekuza nia kondisaun.

"Ba ida ne'e ha'u hanesan aman ha'u labele tolak ninia kondisaun ida hanesan ne'e, katak ha'u fó haan nia loron no kalan toba ha'u labele ko'alia ida ne'e. Se bainhira ha'u hanoin aat ba mate, ne'e Maromak fó sala ba ha'u ka bele kastigu ha'u," katak nia.

Iha sorin seluk, Xefe Aldeia Vailana, Joaquim Ximenes husu ba ministériu kompetente atu fó apoiu ba Marciana ne’ebé sofre kondisaun defisiensia fiziku durante tinan naruk nia laran.

"Ita sura hamutuk iha ema na'in tolu mak defisiensia iha aldeia ida ne'e. Defisiensia fíziku, defisiensia tilun no defisiensia matan. Ha'u husu Governu tenke tulun no ajuda netik sira, tanba sira-nia kondisaun la di'ak hotu,” dehan nia.

Xefe Aldeia ne’e informa, durante ne’e familia husu beibeik kona-ba apoiu ba Marciana, maibé nia hataan katak, nia parte hato’o ona ba parte kompetente sira, maibé seidauk hetan resposta.

Rate this item
(0 votes)

Independente Digital TV