Vise-Primeiru Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Lopes hatete, asina akordu ho parte igreza nia hodi apoiu orsamentu tokon $3.101,134,63 ba konstrusaun igreza parokia São Paulo Lospalos.
“Ohin ami ho Padre parokia asina ona akordu , atu komesa konstrusaun Igreja São Paulo parokia Lautém nian, nune'e Orsamentu ba konstrusaun igreza ne'e ho total tokon $3.101,134,63,” Dehan Vise PM, Assanami, hafoin asina akordu ho Amu Paroku São Lospalo, iha palásiu Governu, Segunda (3/06).
Vise-PM informa, orsamentu ne'ebé aloka dadaun ne'e Orsamentu Jerál Estadu (OJE) 2023 nian, no aloka uluk tokon $1 ba hala'o servisu, depois haree nia progresu konstrusaun la'o mak aloka tan segudu faze nian iha OJE 2025.
Tuir Assanami, konstrusaun ba Igreza São Paulo Lospalos ne'e importante tebes ba Timor Leste, tanba Misionariu Portugés mai hela uluk iha ne'ebá hafoin hala'o evanjelizasaun ba fatin seluk.
Entaun, Prezensa misionariu hirak ne'e konsege forma Timor oan matenek lubuk ida, liu husi hari'i Koleziu Dom Bosco, Fuiloro, Koleziu Dom Bosco Fatumaka, no seluk tan, ohin loron ema barak matenek hodi kontribui ba dezenvolvimentu nasionál.
“Misaun salesiano ema hotu hatene katak mai husi espíritu Dom Bosco nian, Dom Bosco aman ba joven sira no mata-dalan ba joven sira no misaun salesiano ne'e mai halo Timor oan barak mak aprende matenek no to'o agora kontinua nafatin, Koleziu Dom Bosco Fuiloro, Koleziu Dom Bosco Fatumaka no iha fatin seluk tan ne'e hatudu mós identidade ezistensia salesino sira iha Timor-Leste, Igreja ida ne'e la'ós de'it konstrusaun, maibé mós valores prinsípiu identidade ezistensia salesino nian. Nune'e ita presiza apoiu, atu bele konstrui fila-fali igreza ne'ebe nakonu ho istoria, tanba husi sira ita ohin loron matenek barak,” Nia haktuir.
Assanami informa, konstrusaun igreza refere sei hahu tinan ne'e no konstrusaun ne'e durasaun ba tinan tolu, maibe sei aselera para tinan rua hanesan ne'e bele remata ona, nune'e sarani sira bele uza ba atividade relijiozu ni’an.
Iha fatin hanesan, Amu Paroku São Paulo Lospalos, Pe. Venancio Fatima Pereira, SDB, agradese ba Governu ne'ebe iha vontade tomak apoiu orsamentu ba konstrusaun igreza São Paulo Lospalos .
“Lori sarani sira hotu nia naran, agradese ba Governu ne'ebé apoiu ona orsamentu hodi harii ita nia Igreja, hodi bele fasilita sarani sira nia fiar. Aléinde orsamentu husi Governu iha mós sarani sira husi Lautém ne'ebé hela iha rai li'ur no rai laran mós halo kontribuisaun hotu. Nune'e agradese wain ba parte hotu nia tulun. Orsamentu hirak ne'e ita sei jere ho responsabilidade tomak hodi bele atinze ita hotu nia hakarak,” Amu Informa.
Purtantu, konstrusaun igreza refere parte tekniku halo ona levantamentu, rai ne'ebé iha ho medida 75x40 m, maibe atu klaru liu tekniku sei esplika ba publiku iha tempu besik bainhira konstrusaun la'o ona.
