Diretór Ezekutivu Asosiasaun Difesiensia Timor-Leste, Cesário da Silva hatete, tuir ADTL nia prespetiva atu valoriza Ema ho Defisiensia (EhD) nia direitu, governu presiza aloka rekursu, atu bele implementa planu asaun nasionál hodi tuir konvesaun direitu EhD internasionál.
Nia dehan, tuir observsaun ADTL nian katak rekursu ne’ebé governu aloka atu implementa planu asaun nasionál menus tebes tanba estadu la tau prioridade.
“tanba ne’e tuir ami-nia prespetiva atu valoriza ami nia direitu ne’e presiza aloka nia rekursu, tanba ne’e ami halo semináriu ida hodi refleta situasaun sira ne’ebé akontese liu ba, durante ne’e ami-nia akompañamentu alokasaun rekursu estadu ba implementasaun Planu Asaun Nasional (PAN) inklui konvensaun ne’e menus tebes, estadu ladún prioritiza liliu alokasaun orsamentu,” dehan Diretór iha salaun MTK Kaikoli, Tersa (04/06).
Kona-ba bareira ne’ebé EhD hasoru, nia dehan, defisiénsia lubuk ida hasoru mak asesibilidade iha fatin públiku sira no bareira ida mak pensamentu ema polítiku na’in sira ba EhD sira, katak EhD sira la labele halo buat ida hanesan Ema defisiensia matan, tilun, no seluk tan.
Vise-Primeiru Ministru daruak, Ministru Koordenadór Asuntu Sosial no Ministru Dezenvolvimetu Rurál Abitasaun no Komunitaria, Mariano Asanami Sabino hatete, Timor-Leste ratifika ona valór prinsipiu internasionál sira ne’ebé halo tratamentu hanesan ba ema hotu, inklui ema ho defisiénsia sira.
Tanba Timor-Leste nu’udar nasaun soberanu, ne’ebé adere mós ba konvensaun Organizasaun Nasoens Unidas (ONU) ba direitu EhD.
Apoiu programa governu dasia nian ba ema ho difisiensia, nia dehan fó importánsia maka’as ba sidadun vulnerável no Ema ho Defisiensia, atu goza sira-nia direitu no dever hanesan ho sidadaun sira seluk.
“Timor-Leste nu’udar país soberano ida adere mos ba konvensaun ONU ba direitu Ema ho Difesiensiaiha (EhD) programa da-sia ne’e fó importánsia makas ba sidadaun vulnerável sira no ema ho difesiensia atu goza direitu ne’ebé hanesan nomós sujeitu ba deveres ne’ebé hanesan ho sidadun seluk. Eseptu kona-ba deveres ne’ebé nia labele hala’o tanba razaun defisiensia,” katak Ministru.
Vise-Primeiru Ministru ne’e afirma, governo da-sia kria mós medidas apoiu balun mak hanesan, atu estimula kriasaun negosiu auto-sustentavel ba sidadaun ho defisiensia no garante asesu ba infraestrutura publika, atu nune’e fasilita partisipasaun ema ho defisiensia, iha programa hotu ne’ebé Ministeriu relevante sira trasa ona no konteumpla iha PAN.

“Programas hotu ne’ebé mak ministériu relevante sira trasa no kontempla iha Planu Asaun Nasional, integradu no fó mós konsiderasaun hodi envolve Timoroan hotu nu’udar autór no benefisiáriu iha prosesu dezenvolvimentu nasional, atu haree kle’an no deklara katak, iha ita-nia let ka iha ita-nia sosiedade, laiha grupo invalidéz. Ema hotu válidu nudar sidadaun no prontu atu partisipa no kontribui,” nia salienta.
Defisiénsia la’os fatór ida atu justifika katak ema ida laiha kbiit ka labele ona atu halo buat ida, tanba kbiit, poténsia no talentu ema ida-idak nian la hanesan.
ADTL mós lansa video asesibilidade ba Ema Ho Defisiensia no rampa ida, iha edifísiu Ministeriu Transporte no Komunikasaun.