Motorizadas ne’ebé SEI distribui ba iha Pontu Fokál Postu Administrativu sira ho objetivu atu fasilita funsionáriu/a pontu fokál postu administrativu sira hodi hala’o servisu SEI nian iha postu administrativu, liuliu halo monitorizasaun ba grupu benefisiáriu fundus transferénsia públiku, halo atividade sosializasaun prevensaun violénsia bazeia ba jéneru no atividade seluk ne’ebé atribui mai iha SEI.
Sekretária Estadu ba Igualdade (SEI), Elvina Sousa Carvalho, husu pontu fokál postu administrativu sira atu utiliza motorizadas hirak-ne’e ho responsabilidade hodi uza ba apoiu servisu pontu fokál postu administrativu no servisu prinsipál sira hanesan promosaun igualdade no inkluzaun.
“servisu akompanãmentu ba grupu benefisiáriu sira ne’ebé simu fundus transferénsia públik husi sei no mós apoiu ba vítima violénsia bazeia ba jéneru no hala’o sosializasaun ba atividade prevensaun violénsia bazeia ba jéneru no servisu seluk SEI nian iha postu ba to’o iha suku,” dehan Sekretaria Estadu lihu husi komunikadu ne’ebé Online INDEPEDENTE asesu.
Diretór-Jerál SEI, Armando da Costa iha introdusaun informa, motorizadas ne’ebé sei distribui kompra uza orsamentu SEI nian maibé sasán hirak-ne’e perténsia ba iha patrimóniu Estadu.
“Objetivu mak atu apoiu servisu Pontu Fokál SEI iha postu hodi atende servisu Violénsia Bazeia ba Jéneru, monitoriza grupu benefisiáriu fundu transparensia públiku sira, no hala’o servisu seluk iha munisípiu, postu, suku no aldeia sira liuliu bele fasilita pontu fokál sira atu halo servisu estadu tuir polítika no misaun sei ninian,” dehan DJ.
Pontu Fokál hosi Postu Administrativu Fatumea Covalima, Julios H. A. F. Vicente hato’o agradese ba SEI hodi fasilita motorizadas refere no sei kumpre regra tránzitu ne’ebé estabelese. Nia fiar katak motorizada hirak-ne’e bele fasilita pontu fokál sira hodi hala’o servisu diak liután iha área rurál to’o munisípiu.
Iha biban ne’e, SEI mós distribui livru Kódigu Estrada ba pontu fokál postu sira hanesan matadalan atu kumpre wainhira hala’o movimentu ba asuntu servisu iha sira-nia fatin. Kritériu ida-ne’ebé Pontu Fokál sira tenke prienxe mós mak tenke iha Karta Kondusaun molok entrega motorizadas hirak-ne’e.