Notisia ne’ebé lori jornal INDEPENDENTE manan premiu refere mak notisia ho tiltu ‘Sakrifisiu husi laletek sidade ninin’ ne’ebé hakerek husi jornalista Januario da Assunção.

Hafoin simu prémio, Xefe Redasaun Jornal INDEPENDENTE, Jorgino dos Santos, iha ninia intervensaun, hato’o agradesimentu ba Konsellu Imprensa ninia rekoñesimentu ba obra jornalistiku ne’ebé Jornal INDEPENDENTE produs.

"Ne'e hanesan servisu ekipa. Sira halo servisu, esforsu maka’as kontribui informasaun ba públiku," dehan Jorgino, iha Balibó, (16/10/24).

Premiu ida ne’e, tuir Xefe Redasaun, ne’e sai nu’udar motivasaun ba ekipa jornál INDEPENDENTE atu hadia kualidade informasaun ne'ebé hato'o ba públiku.

Jorgino rekoñese katak, durante ne’e kestaun profisionalismu iha servisu jornalismu sai nu’udar preokupasaun públiku.

Jornal INDEPENDENTE iha komitementu no komprometidu atu hadia di’ak liu tan ninia profisionalismu hodi hato’o informasaun ne’ebé kredivel ba públiku.

Iha ambitu atribusaun premiu ne’e, Konsellu Imprensa mós atribui premiu ba kategoria seluk hanesan meius komunikasaun di’ak liu ba Hatutan.com, prémiu Adelino Gomes ba kategoria reportájen lian portugés di’ak liu ba jornalista Dilijente, Eduardo Soares, no preimu ‘Greg Sackleton’ ba kategoria notisia asuntu sosial di’ak liu ba radio no televizaun ba jornalista RTTL, Scos Vieira.

Aleinde, hetan prémio husi Konsellu Imprensa, Jornal INDEPENDENTE hetan mós prémio Maria Goreti husi Centru Nasional Chega (CNC,IP) ho kategoria ne’ebé hanesan, ne’ebé atribui mós ba Jornalista Januario da Asunção.

Enkuantu ba tinan ne’e, laiha preimu ‘Bernardino Guterres’ ba kategoria produtu Foto Jornalístiku tanba obra ne’ebé submete la priense kriteria.

Entretantu, notisia asuntu sosial ho titlu ‘Sakrifisiu husi laletek sidade ninin’ hakerek kona-ba istoria husi familia ida ne’ebé durante tempu naruk nia laran esforsu maka’as hodi bele hetan netik osan atu sustenta sira-nia nesesidade.

Familia husi Antonio Mendonça (47) ho nia feen, Aurelia Soares (26), hela hamutuk ho nia oan na’in lima; Clara Mendonça (11), João Mendonça (8), Nelia Mendonça (6), Abel Mendonça (3), no Xilhadora Mendonça (fulan 11), iha uma-kiik ida ne’ebé lokaliza iha leletek aldeia Karau Mate, suku Ailok, Postu Administrativu Kristu Rei, Munisipiu Dili.

Durante tinan barak nia laran, familia ne’e moris ho situasaun ne’ebé defisil, laos de’it hela iha uma ho kondisaun ne’ebé la di’ak, maibé mós hetan difikuldade boot atu atende sira-nia nesesidade.