Lia Na'in Postu Administrativu Maubessi, Zacarias Bosan hatete, fatin Rabilau mai husi naran Haukrabilau, tanba iha tinan 2012 lian na’in ho komunidade sira iha Aldeia Raimori tur hamutuk ona hodi ko'alia kona-bá kria gruta iha foho leten ne’ebé hanaran Rabilau.
Nia dehan, iha tinan 2012, lia na’in hamutuk ho komunidade Aldeia Ramori hahú tur hamutuk hodi kria inisiativa ida atu konstrui estrada no gruta iha foho Rabilau.
Tanba ne’e, ho inisiativa ne’e, komunidade sira mós konkorda hodi ke'e estrada, hahú husi Maubise-Vila to’o ba iha foho Rabilau.
Nune’e, autoridade lokal ho komunidade sira kontinua organiza malu hodi kria fatin ne’e, sai fatin turizmu komunitaria ida hodi atria turista internasional no mós nasional.
“Ho ida ne'e, ami komunika ba malu katak, koko halo tok turizmu komunitariu iha fatin ida ne'e, atu nune'e hodi bele atrai timoroan hotu no mós estranjeiru sira," dehan nia, iha ambitu abertura ba festiva Rabilau, iha Rabilau Maubise, kuarta (16/10/24).
Lia Na'in ne’e hatutan, fatin ne'e konstrui husi Administradór Munisípiu Ainaro no Administradór Postu Maubisse Vila ne’ebé servisu hamutuk ho populasaun husi aldeia tolu, iha Maubise, hodi kria fatin turizmu komunitaria ne'ebé hanaran turismu komunitariu Rabilau.
Maibé, nia haktuir, hafoin remata konstrusaun ba fatin ne’e, seida’uk iha kuiñesimentu husi nai ulun nasaun nian no laiha ema ida mós hatene fatin refere.
Ho nune’e, autoridade komunitariu hato'o proposta ida bá governu no ikus mai hetan apoiu husi estadu hodi harii uma lisan inkliu infrastrutura sira seluk.
"Ami halo proposta bá nain ulun sira no ikus mai ami hetan apoiu husi estadu mak ami harii uma lisan rua ne'ebé dadaun ita hamrik bá. Tanba, iha tinan kotuk liu bá atu halo Festival iha fatin refere maibé la konsege, no ohin loron ita realiza duni festival Rabilau ne'e,”tenik nia.
Iha Rabilau ne'e, estadu ápoiu hodi harii uma lisan rua ho naran uma lisan Yuit lai signifika “ita ba konvida ema mai” no Det lai signifika “dada ema mai”.
Iha fatin hanesan, Primeiru Ministru Interinu, atual Vise Primeru Ministru, Ministru Koordenadór Asuntu Sosial no Ministru Dezenvolvimetu Rural Abitasaun Komunitária, Mariano Asanami Sabino hateten, Timor-Leste tenke promove ninia paisajen sira ne’ebé kapás, liliu hanesan foho sira iha fatin istoriku no fatin turizmu sira.
"Ita iha foho barak ne'ebé nu’udar forsa ba ita iha tempu rezisténsia, foho ramelau, kablaki, matebian, foho ligumau, foho Tafara, foho tafo ne'ebé iha foho barak ne'ebé hanesan forsa natureza ne'ebé durante ne’e ita iha entaun ita promove,” dehan VPM Asanami.
