Akordu tolu ne’e mak hanesan, Programa Estratéjiku Kooperasaun tinan 2024-2028 ne’ebé asina husi Ministru Estadu no Negósiu Estranjeiru Portugal, Paulo Rangel no Ministru Negósiu Estranjeiru no Kooperasaun Timor-Leste, Bendito dos Santos Freitas, Akordu kooperasaun iha área infraestrutura, asina husi Ministru Negósiu Estranjeiru na’in rua no Ministru Planeamentu no Investimentu Estratéjiku Timor-Leste, Gastão de Sousa no Protokolu kooperasaun bá dezenvolvimentu programa Revive asina hosi Ministru Ekonomia, Pedro Reis no Vise-Primeiru Ministru, Ministru Koordenadór Asuntu Ekonómiku no Ministru Turizmu no Ambiente Timor-Leste, Francisco Kalbuadi Lay.
Primeiru-Ministru, Xanana Gusmão konsidera serimónia asinatura bá akordu sira-ne'e hanesan prova ida tán hosi solidariedade ne'ebé liga povu rai rua nian, hodi destaka kompromisu Governu Timor-Leste bá moris di'ak povu timoroan nian no bá konsolidasaun Estadu.
“La ho kompromisu, esforsu, afeitu no solidariedade husi povu Portugués tomak. Timor sei la alkansa referendu ne’ebé lori ita ba hetan independensia. Ami selebra ona tinan 25 referndu no Portugal selebra tinan 50, 25 Abril, loron rua ne’e mak junta povu no nasaun rua ne’e nian,” Xanana hateten iha komunikadu ne’ebé Online INDEPENDENTE asesu, kinta ne’e (17/10/24).
Xanana Gusmão rekoñese Timor-Leste nu’udár nasaun foun hasoru difikuldade no dezafiu oin-oin, tanba ne’e konta nafatin ho apoia solidariedade Portugal nian.
Maske nune’e, Governu Timorense kontinua servisu maka’as hodi luta bá moris di’ak povu nian, tanba buat sira ne’e hotu hola parte iha konsolidasaun bá prosesu konstrusaun Estadu.
“Tanba ne’e ho apoiu finanseira ne’ebé Governu Portugués oferese bele lori naroman ba future joven timoroan nian,”Xanana Gusmão hateten tán.
Iha oportunidade ne’e, PM Xanana konvida Xefe Governu Portugés atu hala’o vizita ofisiál bá Timor-Leste iha fulan-juñu tinan 2025 hodi partisipa iha Konferénsia Aziátika ne’ebé sei partisipa mós hosi entidade estranjeiru balun.
Iha fatin hanesan, PM Luís Montenegro hateten, rezultadu husi enkontru ne’e maka asina akordu sira, signifika Portugál sei hahú ho Timor-Leste iha planu kooperasaun ida bá tinan haat hodi apoia finanseiru hamutuk millaun £75.
Planu Estratéjiku Koperasaun ne’e destaka iha área oioin maibé pilar prinsipál iha área edukasaun, foka bá Ensinu Lian Portugés, reforsa protokolu kooperasaun nivel sentru aprendizazen no formasaun eskolár CAFE no mós apoia konstrusaun bá eskola Portugés foun iha Dili.
Xefe Governu Portugés ne’e temi mós área estruturante seluk bá dezenvolvimentu TL nian ne’ebé inklui iha planu estratéjiku kooperasaun ne’e maka iha seitór justisa nian.
Alende ne’e, iha mós akordu sira bá diversifikasaun ekonomia no hasa’e seitór turizmu no área infraestrutura nune’e TL bele afirma nia an iha kontestu rejionál no globál.
Kooperasaun entre nasaun rua ne’e iha dimensaun bilaterál no multilaterál, Komunidade País Lian Portugés (CPLP, sigla portugés) no organizasaun internasionál sira seluk, inklui Organizasaun Nasaun Undas (ONU).
Aproveita biban, Luís Montenegro felisita Primeiru-Ministru, Xanana Gusmão ho nia mandatu konklui ona TL nia adezaun bá Organizasaun Internasionál Komérsiu (OMK) no mós adezaun bá Asosiasaun Nasaun sira Sudseste Aziátiku.
Portugal ho Timor-Leste hanesan nasaun maun-alin ne'ebé iha kompromisu bá valór sira demokrasia nian no direitus umanus. Nune’e, amizade nasaun rua ne'e iha relasaun ida ne'ebé labele kotu.
Luís Montenegro mós agradese bá jenerozidade povu Timor-Leste nian ho trajédia sira ikus ne'ebé estraga Portugál, inséndiu iha Madeira ne'ebé Timor-Leste fó asisténsia finanseira millaun $2,5.
