“Durante tinan lima ikus ne’e, Oitavu Governu Konstitusionál halo ona levantamentu osan husi Fundu Minarai hamutuk billiaun $5,4 de’it husi totál montante aprovadu husi Parlamentu Nasionál hamutuk billiaun $7,1. Ida-ne’e hatudu katak iha poupansa ka diferensa entre levantamentu aprovadu husi Parlamentu Nasional no levantamentu atuál kuaze billiaun $1,7,” dehan Ministru Finansas, Rui Gomes, iha komunikadu ne’ebé Online INDEPENDENTE asesu, kinta ne’e (22/12).
Governante ne’e hatutan, hahú husi fulan-Janeiru to’o iha inísiu fulan-Dezembru 2022, Ministériu Finansas mós halo ona levantamentu osan husi Fundu Minarai ho montante totál billiaun $1,4 ka 55% husi totál montante billiaun $2,55 ne’ebé Parlamentu Nasionál aprova ona liuhusi Lei OJE Retifikativu 2022.
Tuir komunikadu, maske foin mak to’o iha loron 22 fulan-Dezembru 2022, maibé, ezekusaun reál OJE Retifikativu 2022 ba Administrasaun Sentrál em termos valor nominál ezekuta ona billiaun $1,56 husi totál orsamentu retifikativu billiaun $3,2.
Entretantu, taxa ezekusaun ne’emak segundu maiór desde tinan 2016 iha ne’ebé Governu konsege ezekuta billiaun $1,63.
