Adjuntu KAK, Luis Oliveira Sampaio hatete, tuir loloos funsionariu sira ne’ebé simu salariu liu $500 tenke hakruk ba dekretu lei ne’ebé bandu sira atu simu subsidiu $200.
"Funsionáriu sira tenke hakruk ba orgaun administrativa boot liu mak Primeiru Ministru mais infelizmente sira la halo, entaun ne'e se ita loke prosesu bele tama krime dezobidensia no fraude tanba sira hatene sira laiha direitu mais sira ba nafatin (simu)"
Bainhira iha Diretór husi ministeriu balun mak simu subsidiu $200, nia hatutan, MSSI la presiza hein KAK, kuandu identifika tenke notifika hodi fó fila subsidiu refere.
"Bainhira notifika mak sira la fó fila entaun ita bele halo prosesu. Dalan ne'e iha hela iha ne'ebá, MSSI labele entega servisu tanba ne'e sira-nia servisu. Uluk kedas ami aviza ba sira atu hasai kedas ema ne'ebé laiha direitu, sira tenke koordena ho finansa no MAE atu hasai dadus sira ne'ebé laiha direitu par pelumenus dadus bele iha," dehan nia.
Nia hatutan, bainhira MSSI identifika no hato’o notifikasaun maibé ema ne’e lakohi koopera hodi fó fila osan, MSSI bele entrega dadus ba KAK no PDHJ hodi halo ninia servisu.
"Ema sira ne'ebé simu ona, simu ba, iha mekanizmu atu ita bele trata. Ko'alia ho Ministériu Finansas par ko'a hotu sira-nia osan ou lori fali osan ba hatama iha fatin ne'ebé sira simu, ne'e mak ita sei halo," dehan nia.
Daudauk ne’e, nia hatutan, KAK halo hela prosesu foti dadus pagamentu atu verifika ema ne'ebé iha direitu no laiha direitu atu simu subsidiu.
Molok ne’e, Koordenador Subsidiu Fim do Ano Munisipiu Dili, Luis da Costa hatete, iha dekretui lei uma-kain ne'ebé ho rendimentu $500 ba leten la simu subsidiu $200, tanba subsidiu $200 ne'e aplika ba uma-kain ne'ebé vulneravel.
Maibé, nia dehan, iha terenu, iha uma-kain balun ne’ebé sira-nia membru ho kargu Diretór Nasionál iha ministériu balun ho salariu $700 mós simu subsidiu.
"Ha'u hetan duni no akompaña iha terrenu Diretór Nasionál no polisia balun simu hotu subsidiu ne'e. Purezemplu, iha polisia eskuarda iha munisipiu Dili nian konsege simu duni $200, to'o ikus koordena mai ha'u hodi fó orientasaun ba Xefe Suku sira fó presaun maka’as konsege fó fali. Maibe Diretór Nasional lina ministerial balun ho salariu $700 mós simu $200, to'o agora seidauk fó fali,” dehan nia iha salaun MSSI, Kaikoli, Kinta (15/12).
Luis informa tan, iha mós Diretór Nasional balun ne'ebé iha prosesu pagamentu haruka sira-nia feen ka oan mak ba simu subsidiu.
"Ami haree direita, Diretór Nasional balun simu hotu, dala-ruma sira haruka feen ba, la'e oan mak ba, maibé sira-nia osan la deklara sai katak, ho rendiementu liu $500 maibé sira nonook de’it. Iha mós Diretór Nasional balun ba simu, la deklara sai rendiementu, maibé ikus mai ami buka hatene tuir sira-nia salariu, balun $700, balun $600," nia dehan.
Bainhira pagamentu remata, nia dehan, ekipa sei hato'o ba superior sira hodi bele prosesa.
“Atu prosesu halo oinsa ne'e kompetensia nasionál, ekipa ezekuta de'it programa no mós fahe informasaun ba sira. Ministeriu relevante sira ne'ebé toma atensaun ba subsidiu ne'e, parte Komisaun Anti Korupsaun no Provedoria Direitos Humanos no Justica no Tribunal mak iha kompetensia atu buka tuir, halo prosesu tuir lei,” dehan nia.
