Liu husi proposta Ministru Finansas, Rui Augusto Gomes, Konsellu Ministru delibera hodi aprova variasaun ba kontratu konsesaun Portu Baía Tibar nian, nune’e bele halo alterasaun ba objetu kontratu konsesaun, ne’ebé ba oin sei inklui tan obrigasaun konsesionária nian atu sosa scanner ba merkadoria sira.

Ministru Prezidensiá Konsellu Ministru, Fidelis Manuel Leite Magalhaes hateten, kona ba ninia instalasaun no manutensaun durante períodu konsesaun, nune’e mós alterasaun ida iha presu kontratuál, ne’ebé aumenta to’o millaun $ 4,411 atu sosa makina ne'e.

"Tuir mai konsellu Ministru delibera proposta husi Ministeriu finansas hodi aprova variasaun ba kontratu konstrusaun ba Portu Baya Tibar nian. Ida ne'e para atu halo onjetivu saida, objetivu atu bele sosa makina X Rey ka scanner ho kapasidade bo’ot ba kontentor sira ne'ebé tama mai," dehan Ministru Prezidensiá Konsellu Ministru Fidelis Manuel Leite Magalhaes, hafoin reuniaun KM iha Palásiu Governu, (21/12).

Nia dehan, tanba presiza makina X Rey boot para kada kontentor ne'ebé tama iha minutu balu de'it para ona no verifikadu ona katak seguru, tanba se la’e presiza mós kapasidade númeru ema boot para atu hander kontentor sira.

Ho teknolojia ida ne'e kontentor ne'ebé tama iha makina ne'ebé simu lori nia tama mai no X Rey ka Scanner kedas ka halo cek no pasa kedas ba iha fatin designadu sira. La presiza ema mak tenke lori ba hatama Rai X ka X-Rey sira depois muda fali ba fatin.

"Teknolojia ne'ebé modernu, teknolojia ne'e sei ajuda ita halo funsiona di'ak liu tan Portu Tibar hodi atinje ita nia objetivu komersiál sira," tenik nia.