Hafoin inkeritu Jornalista Domingos Gomes, deklara katak, karta ne’ebé PSIK diriji ba nia nuudar individu, no husu atu sai testamuña  ba krimi falsifikasaun dokumentus no notasaun teknika, punidu no previstu iha artigu 303 Kódigu Penal Timor-Leste.

“Karta ne'ebé PSIK haruka ba ha’u ne'e individu, maibé mai fali iha ne'e (edifisiu PSIK) sira husu kona fali ba obra jornalista nian. Lolos ne'e ha’u jornalista servisu iha instituisaun ida, ne'ebé karta tenki haruka ba ami nia Xefi iha kantor tanba iha ligasaun ho notisia sira ne’ebé públika iha Jornal INDEPENDENTE,”dehan nia ba Jornalista sira iha Edifisiu PSIK, Kolmera, sesta ne’e (23/12).

Nia hatutan, perguntas sira ne'ebé PSIK husu ne'e ba nia  liga liu ba publikasaun Jornal INDEPENDENTE iha fulan hirak liu ba kona ba osan rihun $30.000 ne’ebé membru Khunto na’in tolu tenta atu lori sai husi Aeroportu Internasional Nikolau Lobato, Dili, ba rai liur.

Iha fatin hanesan, Diretór Jornal INDEPENDENTE, José Sarito Amaral, hatete, kazu ne'e kontinua husi kazu dahuluk ne'ebé uluk PCIC halo karta notifikasaun hasoru Xefe Redasaun Jornal INDEPENDENTE Jorgino dos Santos no Jornalista Domingos Gomes, nune’e iha loron 23 fulan-Dezembru 2022 mai halo ona inkeritu.

Nia dehan, Jornal INDEPENDENTE hetan karta notifikasaun horiseik (22/12), katak ohin (23/12) ne’e, mai presta deklarasaun, maibé nia konteudu la klaru iha karta notifikasaun tanba sira prefere ba individu atu mai testemuña ba tipu kazu saida mak sira kestiona, maibé to'o ohin depois de inkeritu ne’e hotu no hatudu katak iha liga ho kazu dahuluk konaba obra jornalístika.

“Hau hateten fila-fila katak, karta ne’e sala kamar nafatin lolos karta ne’e lá’ós ba ami, tanba bainhira prefere ba individu mak depois to'o iha inkéritu mak husu kona fali ba obra jornálistika ne'e laos individu maibé ne'e instituisaun nia problema,”dehan Diretór.

Ezekutivu ne’e hatutan, karik koalia kona ba instituisaun nia problema, ne'e Diretór ou Xefi Redasaun mak responsavel másimu ba kazu ne'e, maibe sira privatiza tiha kazu intituisaun ne'e mai individu hodi hafasil ba sira atu halo inkeritu ba Jornalista no Xefe Redasaun.

Tuir Diretór, aktu sira hanesan ne’e konsidera hanesan manobrasaun ida atu nune'e bele hamate liberdade imprensa no Liberdade expresaun nian.

“Bainhira PSIK kestiona kona ba obra jornalistika ami sei la koalia buat ida, ami submete ba iha lei komunikasaun sosial ami sei kaer metin artigu 19 dehan katak ami sei lakoalia sai buat ne'ebé ami lahatene, ami so hatene deit bolu iha tribunal,”nia hatuir.

Nia esplika, liga fali ba artigu 34 karik iha notisia publiksaun ruma naksalak ka erru ruma no fó insatisfaz ba publiku ruma ne'e, iha lei hateten momos katak simu sira nia direitu resposta no bele halo retifikasaun maibé to’o ohin loron sira seidauk kontaktu ba Jornal INDEPENDENTE kona ba sira nia direitu resposta.

“Tanba ne'e  ami manten nafatin ami nia pozisaun konteudu husi karta ne'e tanba inkeritu nee liga ba obra jornalista nian,”nia akresenta.

Entretantu, Diretór mós hato’o katak, ninia Xefe Redasaun mós presta ona deklarasaun iha oras tuku 14:30, no Jornalis mós presta deklrasaun iha 9:30.