“AJTL konsidera buat sira ne'ebé autoridade seguransa sira halo ne'e atentadu, entaun saida mak husi AJTL nia akompañamentu nafatin akompaña kona ba kazu ida ne'e, tanba kazu ida ohin sira halo inkeritu ba jornalista INDEPENDENTE ne’e kazu anterior, ne’ebé mai husi Ministeriu Interior ho Polisia Nasional Timor-Leste nian,”dehan Reprezentante AJTL iha área Juridiku nian, Constancio Vieira, ba Jornalista sira iha Edifisiu PSIK, Kolmera, sesta ne’e (23/12).
Nia hatutan, se bainhira PNTL no Ministeriu Interior senti Jornalista hakanek sira ho notisias ka publikasaun ne’ebé lalos, tenki halo karta direitamente ba redasaun la’ós liu fali husi polisia ka sé de'it.
Maibe Tenki ba redasaun atu nune'e redasaun bele halo direitu de resposta no retifikasaun tuir lei komunikasaun sosial.
“Agora ita nia lei komunikasaun sosial ida iha tiha ona entaun ita labele uza lei jeral tanba ema bolu kona ba derota, lei jeral ne'e ita uza bainhira lei espesifiku ne'e seidauk iha, maibé oras ne'e daduk lei komunikasaun sosial iha tiha ona,”tenik nia.
Tuir Constancio, jornalista bele halo sala, tanba ne’e mak iha artigu ne'e dehan direitu de resposta no retifikasau, ida ne’e mak dalan atu hodi resolve.
Nia dehan, agora saida mak PSIK halo, ida ne'e hanesan aktu ida ka prosesu ida hodi hatauk jornalista sira, maibé AJTL husu ba jornalista sira atu labele tauk ba kazu sira ne’ebé agora dadauk mosu.
“Tanba ita nia konstituisaun garante ita nia direitu total, la’ós parsial, tan ne’e AJTL nafatin hamutuk ho jornalista sé de'it no AJTL nafatin defende jornalista sira hotu no mós liberdade imprensa to'o iha ne'ebé de'it,”hakotu nia.
