Atribuisaun karteira professional ne’e ho objetivu atu garante produtu jornalistiku ho kualidade, transparante, informative no edukativu.
Tuir Prezidente KI Interinu, Francisco Belo Simões, hatete, funsionamentu karteira profisional ne'e sai hanesan meius komunikasaun no etika ba jornalista sira atu hala'o knaar ho diak.
“Entaun Konsellu Imprensa, ohin (22/12), hala'o tan serimonia atribuisaun karteira profisional ba ita nia maluk jornalista sira hamutuk na'in 18 ne'ebé finaliza ona estajiu profisional durante fulan 12 tuir lei komunikasaun sosial artigu 14°,”dehan nia iha salaun Delta Nova, kinta ne’e (22/12).
Nia hatutan, tuir Lei komunikasaun sosial artigu 14° hatete. obrigatoriamente jornalista ida atu hetan rekoñesementu husi KI ba karteira profisional, tenki kumpri lei, tanba karteira profisional bele reforsa jornalista ida hodi hatudu nia profisaun ho kualidade, informativu no mós iha kuiñesimentu klean kona ba servisu instituisaun media nian.
“Akreditasaun karteria profisionál ba jornalista nain 18 ne'e sai hanesan atividade prinsipál ida ne'ebé lei komunikasaun sosial fó ba KI, iha tinan 2017 ba atribuisaun karteira profisionál, importante tebes tanba ita hatene katak karteira profisionál nu'udar baze legal ida ba jornalista sira uza hodi hala'o knaar ho diak iha instituisaun media ida”,
Iha Fatin hanesan, Jornalista Antigu, aktual Diretóra Média ONE Timor, Suzana Cardoso, hatete, atu hetan profisaun ba karteira profisional, hanesan parte ida atu apoiu jornalista hala'o knaar iha terenu ho diak liu tan no bele tulun jornalista asesu ba fatin públiku bainhira lori kartaun profisionalismu.
“Atribuisaun karteria profisionál ne'e nu'udar rekoiñesementu baze legal ida husi Konsellu Imprensa ba jornalista sira, maibé karteria profisional mós bele hatudu rekoñesementu no kapasidade jornalista ida ho responsabilidade moral no edukativu. Bainhira publika produtu jornalistiku ba públiku la hamosu duvida husi konsumidor sira,”nia dehan.
Entretantu, Reprezentante Jornalista ne'ebé simu karteira profisional, Rossa Prega, hato’o agradesementu profundu ba Konsellu Imprensa, ne'ebé rekoñese ona sira nia profisaun hanesan jornalista durante hala'o atividade jornalistika.
“Ami nia esprensa ba Konsellu Imprensa atu kontinua programa atribuisaun ida ne'e ba belun jornalista sira iha tempu tuir mai, atu nune'e bele servisu makas hodi kombate informsaun falsu ka hoax iha Timor-Leste no promove liberdade imprensa no liberdade espresaun iha territóriu nasionál,”dehan Rosa.
Enkuantu, Jornalista na’in 18 ne’ebé hetan karteira professional mai husi instituisaun media sira hanesan, Grupu Media Nasionál (GMN TV) na’in neen (6),Suara Timor Lorosa’e (STL) na’in neen (6) Radio Komunidade Kumoro (RCC) na’in tolu 3, Radio no Televizaun Timor-Leste (RTTL, EP), na’in ida (1), Diariu INDEPENDENTE na’in ida (1), no mós Televizaun Edukasaun (TVE), na’in ida (1).
