PR Horta dehan, nia bele akompaña mais la tama iha kompleksidade situasaun nia laran atu bele kompriende, maibé buat balun halo daudaun, la'o ba foho haree obra estrada sira la'o daudaun.

"Governu halo tinan ida loloos ne'e la'ós ha'u mak halo balansu, maibé Primeiru Ministru mak bele halo balansu ho objetividade no koñesimentu, ha'u bele akompaña mais ha'u la tama iha kompleksidade situasaun nia laran atu bele kompriende. Buat balun halo daudaun, ita la'o ba foho ita haree obra estrada sira la'o daudaun, iha obra balun ne'ebé uluk hahú tiha ona kontinua ha'u haree buat sira ne'e," dehan PR Horta ba jornalista sira hafoin remata vizita Estadu ba Angola-Mosambike iha Aeroportu Internasionál Nicolau Lobato Komoro, Dili, Sesta (12/07).

Nia afirma, mas balun Governu hatete halo, tenke halo duni atu haree akordu barabarak ne'ebé uluk halo kompromisiu ho banku divida buat sira ne'e importante duni atu hamoos didi'ak situasaun, atu halo balansu ha'u labele halo.

Alende, PR Horta esplika, iha fulan Setembru mai ne'e abertura nova sesaun lejislativa sei halo tuir normál no tradisaun sei halo diskursu ba nasaun iha Parlamentu Nasionál.

"Ha'u sei halo tuir normál no tradisaun ha'u sei halo diskursu ba nasaun iha Parlamentu Nasionál. Ne'e mak ha'u buka diskursu ida bolu estadu nasaun, konforme prespetiva Prezidente Repúblika haree no Prezidente Repúblika nia rekomendasaun," dehan nia.

Maibé, nune'e Prezidente Repúblika la'ós opozisaun ba governu, opozisaun iha Parlamentu Nasionál, Prezidente Repúblika parseiru Governu nian, parseiru Parlamentu Nasionál PR Horta buka fasilita governu nia governasaun.

"Buat balun ha'u bele la konkorda polítika, maibé ha'u bele la konkorda de'it, tanba se ha'u hakarak halo oin seluk entaun kandidata an ba Primeiru Ministru eleisaun foun mai," hakotu nia.

Molok ne’e, Organizasaun Naun Governamentál (ONG) Luta Hamutuk (LH) konsidera loron 1 Juñu nonu governu kompleta ezisténsia mandatu tinan ida ona, maibé neim atinji kompromisiu ida, tanba ne'e Primeiru Ministru Kay Rala Xanana Gusmão tenke ho fuan bo'ot halo avaliasaun ba prestasaun servisu ministeriál sira nian.

Diretór Ezekutivu Luta Hamutuk, José Alves da Costa hatete, uluk kompromisiu dahuluk mak tenke resolve problema pasaporte to'o agora mós neim resolve, kompromisiu daruak mak kona-ba atu maksimaliza stock aimoruk maibé ida ne'e mós la akontese.

Garantia eletrisidade, garantia folin sasán ida ne'e mak loron 120 nia laran maibé ida ne'e akontese.

"Kompleta ona tinan ida maibé neim kompromisiu ida sira atinji, loron 120 sai tiha kore metan, uluk kompromisiu dahuluk mak tenke resolve problema pasaporte to'o agora mós neim resolve, kompromisiu daruak mak kona-ba atu maksimaliza stock aimoruk maibé ida ne'e mós la akontese. Garantia eletrisidade, garantia folin sasán ida ne'e mak loron 120 nia laran maibé ida ne'e akontese, lalika loron 120, tinan ida de'it la resolve.

Ha'u hanoin atu fó parabens ba sira mós ha'u nia ibun ne'e toos, ha'u sei la fó parabens maibé husu ba sira atu halo ona mundansa," dehan Diretór Ezekutivu Luta Hamutuk, José Alves ba jornalista INDEPEDENTE iha nia kna'ar fatin Faról, Tersa (02/07).

Nia afirma, ministériu sira ne'e di'ak liu tinan ida ne'e Primeiru Ministru tenke ho fuan bo'ot halo avaliasaun ba prestasaun servisu ministeriál sira, no di'ak liu halo mudansa daudauk ona ba, povu sofre demais.

Nia reforsa, bainhira nonu governu mai ne'e kontinua aumenta tan anteriór, kontinua halo kiak ema mak iha mak polítika balun ne'ebé SEATOU halo sobu ema nia uma arbiru laiha planeiamentu. OJE 2024 prevene iha ne'eba kona-ba kompensasaun maibé sobu de'it.

"Ita atu dehan saida, ne'ebé di'ak liu halo reflesaun, liuliu MCI ne'ebé ita gasta osan bo'ot atu bele neutraliza folin foos de'it mós labele to'o agora satan folin sasán sira ne'ebé nia folin sa'e maibé laiha polítika serteja ida di'ak liu halo avaliasaun ba MCI. Di'ak liu avaliasaun ba servisu MJ, Turizmu Komérsiu, MAPPF, MS, ME, SEATOU atu troka ema sira ne'e servisu la loos ne'ebé ba ha'u tinan ida sira estraga tan de'it, Primeiru Ministru Kay Rala Xanana Gusmão nia naran.

Invez ema respeitu maibé halo ema des-respeitu tiha tanba kompromisiu ne'e furak, maibé implementasaun zero," hakotu nia.