PR Horta dehan, to’o ohin seidauk iha instituisaun estadu nian ne'ebé tau-matan ba labarik sira ne’ebé hasoru situasaun hanesan ne’e.
Governu, nia dehan, bele fó ajuda no apoiu hahan, maibé laiha uma mahon ba sira.
"Ami sei ko'alia ho Igreja atu simu labarik na'in tolu ne'e tenke hela hamutuk, tanba sira besik malu demais, depois labele haruka sira ba-mai, se la'e sira trauma loos," dehan PR Horta ba jornalista sira hafoin vizita Estadu ba Angola-Mosambike, iha Aeroportu Internasionál Nicolau Lobato Komoro, Dili, Sesta (12/07).
Labarik na'in tolu ne'e mós ba Aeroportu Komoro hodi simu PR Horta ne’ebé fila ho aviaun Aero Dili.
Iha fatin hanesan, Xefe Aldeia Manubata, Suku Hoholau, Postu Administrativu Aileu Vila, Munisipiu Aileu, Alfonso Tilman Lelo esplika, labarik na'in tolu ne'e nia inan-aman fahe malu ona.
Nia inan-aman tuun mai Dili hodi buka servisu no abandona sira-nia oan na’in tolu ne’e.
“Labarik na'in tolu ne'e nia inan mai buka servisu iha Dili, maibé mai servisu kuaze fulan hitu hanesan ne'e ba vizita labarik na'in tolu ne'e dala ida de'it.”
Oan-mane boot, nia dehan, eskola to'o klase 2 maibé para tiha eskola hodi haree nia alin na’in rua.
Molok ne’e, ekipa Servisu Sosiedade Sivíl no Asuntu Sosiál, Prezidénsia Repúblika, ne’ebé lidera husi Asesór Quintiliano Moniz, to’o iha Aldeia Manubata, Suku Hoholau, Postu Administrativu Aileu Vila hodi haree no lori labarik na'in tolu ne’e.
