Komandante PNTL Munisípiu Dili, Superintendente Xefe Orlando Gomes informa, ekipa servisu sekreta informasaun halo servisu operasaun iha tereinu deteta grupu balun hahú prepara espaduk hodi fó solidaridade ba rai seluk.

"Ita-nia ema servisu sekreta informasaun iha tereinu halo servisu kontinua monitoring nafatin no ita identifika ona fatin ne'ebé mak iha area Juridiku Munisípiu (Dili), grupu balun halo nia atividade prepara spaduk.

“Agora polísia deteta hotu ona, bainhira vizita Amu Papa Francisco mai Timor-Leste mak grupu sira ne'e halo asaun solidaridade ba nasaun seluk hanesan Papua ho Palestina, ita sei haree halo atuasaun," dehan Orlando ba jornalista sira iha nia knaar fatin, PNTL Kaikoli, Dili, Sesta (12/07).

Nia dehan, durante vizita Amu Papa, Dili tenke hakmatek, tan ne’e autoridade seguransa la tolera sidadaun ho grupu balun atu perturba orden públiku.

"Situasaun hotu tenke hakmatek, maibé grupu balun ne'ebé daudaun ne'e organiza prepara sspanduk halo asaun solidaridade ba rai seluk perturba orden públiku, ita sei halo atuasaun ho rigorozu no la tolera sidadaun no grupu balun bainhira halo asaun solidaridade," katak nia.

Tanba ne'e, nia afirma, PNTL la autoriza grupu no sidadaun see de'it atu halo asaun solidaridade, dada spanduk no bandeira nasaun seluk, durante simu vizita Amu Papa Francisco.

Molok ne’e, Diretór Ezekutivu Luta Hamutuk (LH), José Alves da Costa, asaun solidaridade ne'e kestaun umanu ne’ebé iha relasaun ho Direitus Umanus.

"Ha'u hanoin deklarasaun ne'e husi F-FDTL no PNTL mak hasai, maibé regulamentu normas ida ne'e husi governu mak hasai, agora ita tenke konxiente katak asaun solidaridade ne'e lá'os krime,” dehan José ba jornalista Jornál INDEPEDENTE iha edifísiu FONGTIL, Kuarta (10/07).

Durante ne’e, nia hatete, iha mós estetmentu barak husi Amu Papa Francisco kona-ba ninia solidáriu ba nasaun sira ne'ebé ninia povu sira hetan intimidasaun, torturasaun, diskriminasaun no seluk tan hanesan Myanmar, Palestina, Afganistaun, Sahara.

“Se iha fatin ida, iha país ida mak iha hela diskriminasaun, iha hela intimidasaun, iha hela torturasaun, iha hela jenosida mak Timor, nasaun kiik, nonook signifika Timor haluha an.”

Tanba, nia dehan, uluk iha prosesu luta ba ukun an ema barak husi nasaun oioin fó sira-nia solidariedade.

“País demokrátiku ne'e laiha problema ida ne'e, ne'ebé loloos ne'e la devia ita ko'alia ne'e, tanba ha'u sente katak orsida Amu Papa Francisco rasik mós dala-ruma sei sente katak ita-nia fuan solidáriu ne'e lakon tiha ona.”

“Timor dehan uluk solidáriu demais tanba sira-nia pasadu ne'e apoiu husi internasionál ne'e barak, maibé nú fim agora iha nasaun barak ne'ebé nia povu enfrenta situasaun hanesan maibé TImor kontinua nonook de'it, ne'e mós imajen la di'ak," dehan nia.

Tan ne’e, José dehan, tuir nia, atu see de'it, ativista ka pesoal ne'ebé iha hanoin atu hatudu solidariedade ba nasaun seluk, ne'e laiha kestaun.

“Se inflitrasaun to'o tama iha ne'ebá mak halo disturbasaun atu estraga ambiente ka situasaun ida ne'e mak dala-ruma tenke sukat, maibé ema hanesan hatais de'it faru ka bandeira iha nia uma ka iha fatin ne'ebé de'it ka, la'ós iha Igreja, hanoin ne'e laiha problema.”

Iha fatin ketak, Vise Diretór dahuluk Asosiasaun HAK, Antonino de Limas hatete, desizaun husi PNTL ho F-FDTL atu bandu ema halo asaun solidariedade internasionál ne'e laiha baze.

Tanba, nia dehan, iha konstitusaun RDTL artigu 10 garante sidadaun hotu-hotu bele espresa sira-nia solidaridade umanu ba nasaun ka rai seluk.

“Atu dehan liafuan ida bandu ne'e mai sosiédade sivil haree, hanesan ameasa de'it, tanba estetmentu ne'e sai laiha baze. Tanba primeiro, baze ne'e mak Konstituisaun, ne'e fó dalan ne'ebé se estadu ka governu mak atu fó solidaridade ne'e mak labele, maibé sidadaun nafatin nakloke.”

Tuir nia, se mensajen ne’e ba membru PNTL no F-FDTL mak labele fó solidaridade, ida ne’e loos.

"Maibé, se atu bandu sidadaun ha'u hanoin ne'e instituisaun PNTL no F-FDTL laiha autoridade atu bandu ida ne'e, tanba ne'e laos instituisaun rua ninia kompeténsia.”

Nia hatutan, bainhira Amu Papa Francisco mai Timor-Leste mak sidadaun balun fó nninia solidaridade ba rai seluk, ne'e direitu ida.

“Kualkér solidaridade internasionál ne'e bele akontese, sidadaun Timor-oan laiha buat ida atu kesi, estadu mós labele bandu ida ne'e," katak nia.