Nia haktuir, Timor oan ne’ebé tama iha vida insituisaun F-FDTL komesa forma karakter military, iha fatin aprende regra ho formasaun nivel aas no displina, molok ba unidade no komponente sira seluk.
“Ita sente orgullu ho istória SIKNL nian ba formasaun nivel aas ne'ebé fornese ona, militar hotu ne'ebe liu husi prosesu ne'e tenke haka'as an atu fó ónra ba istória ezisténsia. Ha’u ko’alia iha fatin barak katak, militar sira ne'ebe sai husi fatin ne'e tenke dignifika valór instituisaun liu husi ita boot sira-nia hahalok, iha instituisaun laran no sosiedade, ita boot sira tenke sai ezemplu kona-ba ónra no dedikasaun ba nasaun ho povu,” informa Falur Rate Laek iha nia diskursu komemorasaun ezistensia tinan 23 Sentru Instrusaun Komandante Nicolau Lobato, iha Metinaru, (19/02).
Nia dehan, fatin ida ne'e forma ona jerasaun foun Forsa Armada ne'ebé komprometidu ba valór sira ne'ebé guerrilleirus FALINTIL sira husik hela ba militar foinsae sira hodi banati tuir, tan ne’e militar hotu presiza servisu hamutuk atu nune'e Sentru ida-ne'e iha kapasidade atu renova an hodi hatán ba dezafiu sira tempu ohin loron nian, hodi halo inovasaun hodi hatan ba nesesidade importante sira militár nian no presiza sai Sentru ne'ebe reziliente hasoru dezafiu, ho sentidu misaun ne'ebé forte.
Tanba ne’e loron ohin momentu simbóliku, maibé importante tebes atu ema hotu hahi’i istória no ema hotu ne'ebé servi ona iha ne'e, nune'e mos agradese ba sira ne'ebé kontinua haktuir legadu sira ne'e.
“Ha'u hakarak atu kongratula membru militar ida-idak, tanba ita boot sira fo an tomak ba identidade instituisaun ida-ne'e, servisu atu asegura kondisaun sira ne'ebé iha ona, no kontinua fó resposta apropriadu ba formasaun identidade militár nian ba ita-nia militar sira hotu ne'ebé sei mai iha ne'e hodi hola parte ba familia boot FALINTIL-FDTL,” informa nia.
Nia informa, militar hotu tenki fó valór ba servisu badinas no esforsu tomak ho kolaboradores hotu iha Sentru Formasaun Komandante Nicolau Lobato, tanba ne’e iha aniversáriu ne'e mós simboliza tempu atu hanoin kle'an, iha ne'ebé militar haree ba futuru no dezafiu ne'ebé dadaun hasoru, sempre koko atu halo di'ak liután.
Nia afirma, Importante mak militar hotu hanoin ba sustentabilidade Sentru ida-ne'e nian iha ninia aspetu rua, dahuluk mak ensinu no formasaun, baze ba konstrusaun identidade militár tuir prinsipius no valores husi Doutrina FALINTIL no daruak mak inovasaun, atu adapta an tuir ezijénsia sira iha tempu ohin loron nian hodi hasa'e kualidade tuir padraun internasionál.
“Maske ita iha era Milenial ba Sistema Informasaun no Teknolojia, iha CICNL mos sei introduz nafatin Istória Militár ka Estratéjia Luta ba Libertasaun Nasionál, no fó nafatin oportunidade ba instrutores sira hodi atualiza an liu husi formasaun oin-oin iha rai laran no rai liur hodi hasa'e kualidade ensinu iha vertente hotu husi kurrikulu Sentru ida-ne'e nian,” subliña nia.
Tanba ne’e militar hotu tenki hamutuk fó agradesimentu ba apoiu nesesáriu husi instituisaun no entidade oin-oin, parseirus dezenvolvimentu, no asesór internasionál sira ne'ebé kontribui ba hasa'e kualidade no exelénsia husi Sentru ida ne'e nian, tanba apoiu husi ema hotu-hotu, militar sei kontinua hari'i Sentru ne'e hanesan laboratóriu ba formasaun identidade militar ne'ebe forma kuñesimentu, karákter no lideransa.
“Iha parte seluk ne'ebe hau hakarak realsa maka, importánsia husi formasaun fizika no desportu ba Forsa Armada ne'e esensiál tebes iha preparasaun fiziku, morál, psikolójiku no kombate ba mane no feto iha F- FDTL hodi iha kapasidade atu mantein unidu no motivadu hodi kumpre sira-nia misaun no knaar oioin,” dehan nia.
Tanba ne’e CICNL presiza promove la'ós de'it melloria husi kualifikasaun tékniku profisionál militár, maibé mós iha nesesidade hodi garante katak militar sira iha asesu ba saúde no progresaun iha karreira militár hodi afirma prinsipiu kultura militár ne'ebe respeita iha irarkia.
“Ha'u konklui hau nia liafuan ho agradesimentu boot ba ita boot sira hotu ne'ebé servi iha CICNL ho esforsu, dedikasaun no komitmentu, susesu ba ita boot sira hotu,” tenik nia.
Iha fatin hanesan Komandante Sentru Instrusaun Komandante Nicolau Lobato (CICNL), Tenente Koronel, Eugenio Guterres "TOFA" hateten, marka tan istoria ida ba Sentro de Instrusaun Komandante Nicolau Lobato, hodi selebra nia existênsia ba dala-23, ida ne’ebé importante tebes iha nia Instituisaun FALINTIL- Forsa Defesa Timor-Leste.
“Ita hotu hatene katak, CICNL mak hanesan unidade ida ne’ebé responsabiliza ba treinamentu no formasaun militares hotu iha F-FDTL, hau senti onoradu tebes, tanbá bele desafia hau nia lideransa atu bele buka solusau ida ne’ebé adekuadu, hodi fo formasaun ida ne’ebé ho kualidade diak baseia ba forsa modernu ohin loron nia,” dehan nia.
Tanba ne’e loron 19 fulan Fevereiro kada tinan CICNL halo selebrasaun ba ezistensia, mesmu hasoru desafiu oin-oin, maibe ho dedikasaun no profissionalismu husi membru hotu iha CICNL, konsege kumpri duni tarefas ne’ebé atruibui ho susesu.
Nia dehan, hahu husi tinan 2021 to’o mai iha tinan 2023, CICNL halo formasaun no treinamentu militares ho nia tipu ne’ebé diferente, no iha tinan 2021-2022 konsege fó formasaun ba praças ho kuantidade ne’ebé bot tebes ho total foramandu nain 1200 soldadu ne’ebé inkorpora iha fase rua, iha tinan rua tui tuir malu.
Nune’e iha tinan 2023 CICNL mos fo formasaun no treinamentu militares barak, prinsipalmente kursu espesializasaun no mos kursu Promosaun ba kategoria oin-oin hanesan formasaun no treinamentu militares ne’ebé mak CICNL realiza iha tinan 2023 mak hanesan, kursu Promoção ba kapitaun ho total 59 formandu, kursu atualizasaun ba ofisiais kuadru permanente ho total 26, kursu formasaun ba Sargentu ho total 150 formandu, kursu promosaun ba Cabos ho total 120 formandu, kursu formasaun Básika a Banda Militar ho total 26 formandu no kursu formasaun ba ofisiais kuadru Permanente ho total 126 formandu, ne’ebé mak komesa iha tinan 2023 no sei termnia iha loron 8 fulan marsu tinan ida ne’e.
Alende ne’e realize mos kursu formasaun espesializasaun ne’ebé mak realiza iha tinan 2023 mak hanesan, formasaun lian Inglesh, formasaun ba operasaun Apoiu a Paz, kursu espesializaun iha área enjenaria, mediku no kondutores, formasaun ba lian português iha fase experimentasaun ba kursu intensivu língua português.
Tanba ne’e, formasaun no treinamentu militar ne’ebé halao iha tinan 2023, CICNL mos responsabiliza hodi halo treinamentu preparativu ba membros F-FDTL ne’ebé ba partisipa iha kompetisaun tiru iha Darwin-Australia, no F-FDTL sai hanesan melhor klassifikasaun tiru iha klasse individual iha kopetisaun refere.
“Iha tinan ida ne’e mos, baseia ba ita nia planu formasaun anual, ita mos sei realiza fomasaun no treinamentu militar iha tipu oin oin ne’ebé maka planeado ona atu exekuta,” subliña nia.
SIKNL Planu Realiza Kursu Kategoria 8
Komandante Sentru Instrusaun Komandante Nicolau Lobato (SIKNL), Tenente Koronel, Eugenio Guterres "TOFA" hateten, iha tinan ida ne;e Planeamentu ba formasaun no treinamentu ne’ebé mak prepara realize hamutuk kategoria-8.
Tuir planu ne’ebé Sentru Instrusaun Komandante Nicolau Lobato (SIKNL), iha tinan ne’e kompostu husi kursu promosaun kapisaun, kursu formasaun ofisiais ho rejime espesial CFO kuadru Permanente, kursu promosaun sarjentu-ajudante, kursu formasaun sarjentu, kursu promosaun kabu, kursu elementar operasaun apoiu a paz, kursu observador militar no kursu espesializasaun sira seluk ne’ebé mak preparadu ona atu exekuta mos iha tinan ida ne’e.
Tuir nia hare ba volume kursu ne’ebé mak preparadu ona atu realiza iha tinan ida as tebes, nu’udar komandante iha SICNL ekorajam nafatin ba membru hotu atu kontinua servisu makas, hatudu nafatin dedikasuan komitmentu disiplina no profissionalismu atu nune’e bele atinji metas ne’ebé estabelese ona.
“Hau agradesimentu espesial ba familias militares SIKNL nia ne’ebé mak, durante ne fo apoiu makas hodi suporta ita bo’ot sira nia oan, maun, alin, kaben, hodi nune’e sira halao sira nia servisu ho diak iha ita nia unidade, hau orgulho tebes tanba, iha tinan kotuk mos ita la hasoru problema familiares ruma ne’ebé mak prejuidika mebrus sira nia servisu,” informa nia.
