"Ita nia lei protesaun labarik foin hahú atu implementa, maibé ita presiza lei sira seluk ne'ebé atu fó forsa ba baze legal mai INDICA atu halo servisu," informa Dinorah Granadeiro ba Jornalista INDEPENDENTE iha nia knaar fatin, Kaikoli, foin lalais.

Nia fó exemplu, to'o ohin loron esbosu dekreitu lei ba traballu infantil sei pendente hela, ne'ebé INDDICA esforsu iha tinan 2022 maibé to’o agora la konsege.

“Agora ita atu tenta hare'e oinsá lori ba Konsellu Ministru atu bele fo baze iha INDDICA no instituisaun sira atu halo servisu ida ne'e, no meius INDDICA atu kontrola labarik sira ne'ebe kontinua fan sasan iha estrada publiku,” tenik nia.

INDDICA sei servisu hamutuk ho PNTL ba terun hodi halo monitorizasaun ba labarik sira no sei halo atuasaun ba asuntu refere ne'e.

Nia dehan, liu-liu alin inklui feto sira ne'ebe servisu kadaves  iha fatin publiku to'o horas 11:00 kalan, INDDICA iha diskusaun inisiu PNTL munisipiu Dili no INDDICA halo pedidu normal ba komisariu PNTL ho Ministeriu Interior (MI).

Esforsu ida ne'e INDDICA halo hela iha tempu badak uza meius publikasaun husi media atu anunsia iha publiku no liu-liu inan-aman ho fámilia sira  ne'ebe responsabilidade ba labarik sira ne'e.

Nia afirma, labarik sira la bele kontinua fan sasan, oinsá nakonu nesesidade familia nia, tanbá ne'e la'os sira nia obrigasaun no diver maibé dala ida tan nakonu nesesidade fámilia nia ne'ebé inan-aman sira nia obrigasaun no diver.

Iha tinan 2024 INDDICA sei uza meius publikasaun barak atu bele kontinua fo hanoin sosiedade sira, oinsá atu bele hare no kuidadu labarik sira labele fan sasan iha estrada publiku.

“Oinsá atu hases labarik sira no fo protesaun ba sira, maibé ema adultu iha responsabilidade ba labarik sira, ne’e duni iha tinan 2024 INDDICA sei halo asementu foun ba labarik sira fa'an sasan iha estrada publiku no merkadu.

INDDICA sei mantein nafatin dadus uluk nia  kona-ba labarik sira fa'an sasan iha Munisipiu Dili hanesan Loja, merkadu no estrada publiku sira hamutuk  300 pesoal.