Diretór FONGTIL, Valentim da Costa hatete, FONGTIL apoiu politika Serve.Ip nian, maibé tenke koopera hamutuk ho autoridade lokal sira hodi identidika uma kos hirak ne'ebe fó aluga ba ema.
"Ami konkorda kuadu sira (Serve) halo levantamentu, maibé presiza servisu hamutuk ho autoridade sira atu define loloos uma sira ne'ebe funsiona hanesan kos, no uma sira ne'ebe konsidera hanesan familia molok aplika lei, " dehan Valentim da Costa ba Jornalista INDEPENDENTE liu husi via telephone, (19/02).
Nia dehan, ema balun mai husi foho hela hamutuk ho familia, ne'ebe oferese kuartu rua (2) ka tolu (3) ne'e la’os kos puru,maibé importante mak tenke define loloos tuir estandarizasaun.
Nia informa, atu define uma kos ne'e tenke halo ketak, tanba uma balun ne’ebé hamutuk ho familia sira ne’e la’os kos para atu selu tasa ba estadu.
" Sira tenke define kriteria estandarizasaun ho sasan sira ne'e, tanba konsidera kos ne’e presiza kria kondisaun ruma para ema bele hatene no obedese ba regras sira ne'ebe serve aplika," tenik nia.
Entertantu Diretór Serve.Ip, Florencio da Conceição Sanches hatete, planu ne’e Serve.Ip halo iha tinan kotuk, maibé foin mak halo koordenasaun ho Munisipiu Dili no autoridade lokal sira.
"Agora ami sei konsolida para informa uluk lai ba iha autoridade Munisipál, atu nune'e Prezidente Autoridade bele informa ba autoridade lokal sira hanesanm Xefe Aldeia ho Xefe Suku sira nune'e ami tuur hamutuk hodi bele hahú servisu ida ne'e,"dehan nia ba Jornalista INDEPENDENTE liu husi via telephone, fulan kotuk.
Kriteriu atu rejistu uma kos iha rua (2), ida karik uma nain hakarak sai kompaña iha kriteria haat (4) ka lima (5) ne’ebé tenke priense. Maibé, karik lakohi sai kompaña, entaun iha kriteria tolu (3) de'it, ida ne’e Serve.Ip.bele halo lalais iha 24 oras nia laran ho gratuita.
"Planu ba tinan ida ne'e,ha'u sei halo koordenador ho autoridade Munisipál Dili para koordena ho sira nia xefe suku ho xefe aldeia sira para ami tur hamutuk hodi tau ona orariu sa fulan para ita bele kompleta ona servisu," tenik nia.
Nia esplika, maske reseita kikoan mais presiza tau hamutuk, tanba atu sai membru Asean no WTO labele iha komersiante ne'ebe konsidera informal.
