Nia dehan, F-FDTL mai husi ezersitu regulár ne’ebé povu hanaran FALINTIL ne’ebé transforma aan iha 2001, iha Aileu no momentu ne’ebá sei iha situasaun difisil tanba seidauk iha rekursu umanu ne’ebé sufiente atu dezenvolve institusaun F-FDTL, tanba komandante ne’ebé iha tempu ne'ebá komanda F-FDTL maioria la mai husi kursu formasaun akademika.
“Ita nian forsa sira tuir ona kursu formasaun sarjentu, kursu formasaun ofisiál no kursu formasaun akademiku iha fatin-fatin. Tanba ne’e, ha’u bele dehan instituisaun ida ne’e hahú halo mudansa iha área rekursu umanu,” dehan Jenerál Falur iha Kuartel Jerál F-FDTL, Fatuhada, Dili, horisehik.
“Lakle’ur tán ita komemora loron aniversariu tranformasaun FALITIL ba F-FDTL ba dala-23 ho ida ne’e ita presiza aprende liu tán iha siensia liuliu iha siensia militár, atu ita bele adapta iha mundu agora, tanba siensia ne’e bele aprende iha oras 24 hodi moderniza aan no profisionaliza ita nian aan sai forsa profisionál hodi adapta mundu agora,” informa nia.
Tenente Jenerá Falur kompara uluk FALINTIL transforma aan ba F-FDTL fofoun ne’e forsa sira seidauk iha uniforme rasik sei hatais farda ONU nian, maibé transformasaun FALITIL ba F-FDTL iha tinan 23 nia- laran forsa iha ona uniforme rasik.
Nia hatuir tan, uluk F-FDTL seidauk iha lei, maibé F-FDTL agora iha ona lei propriu atu regula forsa liu liu regulamentu internál inklui lei disipliña militár.
“Uluk ita laiha kilat ne’ebé modernu, maibé agora ita iha kilat modernu no uluk mós ita laiha lojístika, maibé agora dadaun ita iha ona lojistika ba forsa sira,” dehan nia.
Tenente Jenerál Falur rekorda katak uluk F-DTL laiha meiu sira, maibé F-FDTL agora iha transporte sufisiente ne’ebé forsa sira uza hodi halo servisu.
Xefe Estadu Maiór Jenerál F-FDTL rekorda mós F-FDTl uluk laiha forsa kompañia terrestres maibé agora iha Komponente Terrestres, Navál no agora dadaun Komandu F-FDTL estabelese tán Komponente Aereo.
“Agora ita buka profisionaliza no moderniza liu ita ita nian forsa tempu ona atu profisionaliza nune’e moderniza ita nia forsa iha mundu ohin loron,” informa nia.
Tanba ne’e selebrasaun aniversariu tinan ida ne’e komandu F-FDTL hili tema sentrál ida “ tempu Profisionál tempu Moderniza".
“Ita presiza tebes moderniza ita nian forsa ekipamentu, rekursu umanu no profisionál ita-nian forsa atu sai forsa ne’ebé profsionál liu tán iha futuru,” afirma nia.
Tanba ne'e Tenente Jenerál Falur hakarak iha ambitu komemorasaun aniversariu tranformasaun FALITIL ba F-FDTL dala 23 ne’ebé sei halao iha loron 2 fulan fevereiru 2024 ne'e sei iha mós promosaun deviza ba membru F-FDTL lubuk.
“Ha’u simu lista ba membru F-FDTL ne’ebé sei halo promosau deviza iha tinan ne’e no ha’u foin aprova lista husi komisaun promosaun sira ne’ebé atu promove ne’e barak, sira ne’e sei promové ba postu ofisiál husi Tenente ba kapitaun iha feto ida no Amo Kapelaun Tenente Rui Gomes sei promove ba kapitaun tanba nia foin remata nia estudu mastradu iha Brazíl,” hakotu nia.
Iha fatin hanesan Prezidente Komisaun organizasaun ba aniversariu tranformasaun FALITIL ba F-FDTL dala 23, tinan ne’e Koronél Arlindo Nune’e hateten, seremonia komemorasaun aniversariu transformasaun FALINTIL F-FDTL ba dala 23 tinan ne’e sei halo iha deit Kurtel F-FDTL.
Tuir sekuensia husi serimónia mak iha 1 fevereiru 2024 Komandu F-FDTL sei organiza missa agradimentu ne’ebé sei preside husi Amo Kapelaun Tenente Rui Gomes iha Kuartel F-FDTL, hafoin missa Komandu sei organiza hodi kari Aifunan iha Jardim Erois Metinaru.
No iha 2 Fevereiru 2024 sei iha seremonia komemorasaun aniversariu transformasaun FALINTIL F-FDTL ba dala 23 tinan ne’e sei halo iha deit Kurtel F-FDTL ne’ebé partisipa husi Konvidadu Espesiál hanesan Xefe Estadu Maiór Jerál Forsa Aústralia no Portugal no konvidadu espesiál rai laran.
