Hon Pat Conroy MP, nu'udar Ministru ba Dezenvolvimentu Internasionál Pasifiku no Ministru ba Defeza Indústria hatete, objetivu vizita Timor hodi hasoru malu ho Primeiru Ministru, Kay Rala Xanana Gusmão hodi hametin liután parseria ba tempu naruk, liu-liu dezenvolvimentu ekonómiku, umanu no seguransa.
"Mai vizita Timor-Leste hodi hametin liután ami nia parseria ba tempu naruk ho Timor-Leste, ne'ebé sai hanesan ami-nia viziñu ida ne'ebé besik liu," dehan nia, iha Palásiu Governu, horisehik.
Nasaun TL no Austrália iha parseria ida ne'ebé forte no amizade ne'ebé besik liu no ne'ebé sustenta husi ligasaun istórika no kulturál ne'ebé kle’an dezde uluk to'o ohin loron.
Enkuantu vizita iha Dili hasoru malu ho Primeiru-Ministru, Xanana Gusmão no figura senior sira iha Governu Timor-Leste hodi reforsa kompromisu Austrália nian ba dezenvolvimentu ekonómiku, umanu no seguransa, preparasaun ba dezastre no prioridade mobilidade traballadór nian.
Durante nia vizita, Ministru Conroy anúnsia tân fundus hodi suporta servisu polisia ne'ebé kualifikadu no profisionál iha Timor-Leste liu husi Programa Dezenvolvimentu Polisia Timor-Leste TLPDP.
"Kompromisu tokon AU$35 dólar Austrálianu ne'e sei estende parseria polisia ne'ebé susesu entre Polísia Federal Austrália nian no Polisia Nasional Timor-Leste (PNTL) ba tinan lima tán," dehan nia.
Aleinde ne'e, Ministru Conroy mós anúnsia programa foun ida hodi fò apoiu ba traballadór Timor oan sira ne'ebé partisipa iha Eskema Mobilidade Traballu Pasifiku Austrália (PALM).
"Servisu parseria ami hamutuk ho Governu Timor-Leste, kompromisu tokon AU$4 ida ne'e sei fornese apoiu sosiál no reintegrasaun adisionál hodi maximiza benefisiu sira ne'ebé sei kontinua ba partisipasaun traballador Timor oan sira nian iha eskema PALM," nia dehan.
PALM fornese empregu, oportunidade no rendimentu ba Timor-Leste nia traballadór sira. Maizumenus traballador Timor oan hamutuk ema 4.500 mak oras ne'e servisu hela iha Austrália iha eskema PALM nian, ho remisaun sira daudaun ne'e, sai hanesan kontribuisaun segundu boot liu ba Timor-Leste nia Produtu Doméstiku Bruto nian hafoin mina-rai no gás.
Ida seluk maka Ministru Conroy mós anúnsia ona tokon AU$1.58 hodi ajuda Timor-Leste prepara no responde ba impaktu sedu husi El Niño. Ida-ne'e parte husi pakote apoiu millaun $5 ne'ebé fornese ba Timor-Leste no Pasifiku.
Austrália nafatin sai nu'udar Timor-Leste nia parseiru dezenvolvimentu no seguransa boot liu no sei kontribui ba estimativa tokon AU$118 iha asisténsia dezenvolvimentu iha tinan 2023-2024.
Iha fatin hanesan Primeiru Ministru Kay Rala Xanana Gusmão hatete, Koperasaun iha área barak no loloos atu Dezenvolve estadu Timor-Leste iha área sosiál sira hanesan edukasaun no saúde iha kriasaun empregu no seguransa nian.
"Sira dehan ami sei kontinua ko'alia ami sei kontinua esplora. Ita hatene saida mak ita presiza iha sei ajuda ita, prinsípiu governu nian mak sei ajuda de'it bu'at ne'ebé ita presiza," nia dehan.
Vizita ida ne'e importante tebtebes atu hametin TL nia koperasaun no Ministru Defeza Estadu nian ho minutu ida Iha ne'e mak foin primeira-vez nia fó no diskute uitoan kona-ba kooperasaun.
"Iha meiu komunikasaun sosiál ida-ne'e no Australia sei ajuda ita dezenvolve nasaun ne'e, ha'u sei deklara iha área sosiál sira hanesan edukasaun no saúde. Iha kriasaun empregu no seguransa iha ita-nia nasaun," tenik PM.
