Diretór Jeral Ministériu Solidariedade Sosial no Inkluzaun (MSSI), Florencio Pina Dias Gonzaga informa, MSSI servisu parseria no kontinua apoiu ba programa sira ne'ebé define husi instituisaun sentru soliriedade sosial hamutuk 31.
Husi instituisaun 31 ne’e, iha Sentru Komunitáriu 10, Sentru Soliriedade Sosial ho Orfanatu 4, Uma Mahon 8, no instituisaun tau-matan ba ema ho defisiensia 9.
"Instituisaun hamutuk 31 mak MSSI konsege asina akordu ona, aloka orsamentu ba sira no orsamentu apoiu la hanesan, maibé depende sira-nia programa ho atividade no benefisariu sira," dehan Florencio ba Jornalista INDEPENDENTE, iha nia knar-fatin, Kaikoli, Tersa (20/08).
Ba tinan ida ne’e, nia dehan, MSSI preve orsamentu $1.354,282.16 ba apoiu organizasaun sira.
MSSI, nia hatutan, oferese apoiu bazeia ba proposta husi kada organizasaun. Proposta husi organizasaun 31 ne’e kuaze tokon $2, liu tiha orsamentu ne'ebé prevee.
Maibé hafoin liu husi diskusaun naruk, konsege hamenus programa balun ne’ebé ladun importante atu implementa iha tinan ida ne’e.
"Ita haree katak tanba Ministeriu balun ho Diresaun relavante sira implementa ona no ita haree programa seluk prioriedade liu, ho nune'e programa balun ita hasai ho atividade balun hasai tiha," nia esplika.
MSSI apoiu instituisaun soliriedade sosial sira hodi implementa programa ne'ebé kabe ba kompetensia MSSI nian.
“Tanba rekursu limitadu entaun instituisaun balun ne'ebé iha kbiit atu bele implementa ida ne'e kontinua apoiu orsamentu.”
“Ezemplu konkreta MSSI mak responsabilidade uma mahon iha rai laran nune'e bele asegura vitima sira, tantu labarik no feto, maibé MSSI seidauk desponivel estabelese uma mahon naton iha rai laran, entaun kontinua reforsa uma mahon sira ne'ebe parseriu sira halo,” nia esplika.
Aleinde ne’e, nia dehan, fatin alternativu sira hanesan orfanatu ba labarik sira loloos governu mak tau-matan, maibé temporariamente fó de’it apoiu ba instituisaun sira ne'ebe fó mahon ba orfanatu sira.
Entretantu, organizasaun sira ne’ebé MSSI apoiu mak hanesan: Sentru Sosial Imaculada Conceicão Moru-Lautem, Congregasaun do Salesiano de Dom Bosco Lospalos-Lautem, Sentru Komunidade Canossiana São Miguel Lospalos, ONG Luzero Uma Mahon Lospalos, no Knua Haberan Komunidade (KHK) Vikeke Villa.
Sentru Dezenvolvementu Komunitária Madre Trindade Dilor Vikeke, Fundasaun Dom Bosco Timor-Leste LAR de Sta Terezina Kelikai, Kongregasaun Putri Maria Yosep Buruma-Baukau, Fundasaun Uma Prontu atu Servi, Fundasaun Sao José (Centro de Dia), no Orfonatu São Domingos Savio Venilale-Baukau.
Orfanatu Beata Laura Vicuna Laga-Baukau, Fundasaun Fraternidade Franciscana da Vina Providensia Padiae, Sentru Esperansa ba Feto Salele-Suai, Sentru Lorosa'e Holarua-Manufahi, Organizasaun Fokupers (Uma Mahon Maria Tapo), Fundasaun das Irmas Reparadores de Nossa Senhora Maliana, no Fundasaun Mosteiro de Sta Clara do Santismo Sacramento (Centro de Acolhamento Sosial Tunabibi-Maliana).
Fundasaun Hospitaleira de São João de Deus Laklubar-Manatuto, Sentru de Pas Sta. Isabel Canossa Manatuto, Sentru Komunitáriu Sta. Teresa Saldanha Remixio-Aileu, Fundasaun Lar do Bom Samaritano Laulara-Ermera, Klibur Domin Tibar-Likisa, Sentru de Cuidado a Criansa (Casa de Vida) Farol-Dili, SOTL (Asosiasaun Spesial Olimpics Timor-Leste) Bekora-Dili, no sira seluk tan.
