Husi kazu ne’ebé rejistu iha PDHJ durante tinan 13 nia laran, Ministériu Edukasaun, Ministériu Saúde, Ministériu Agrikultura no Peska, Ministériu Interiór, FFDTL no PNTL mak hetan númeru violasaun barak liu.

“Kazu mal administrasaun iha 2.050 no kazu ba violasaun direitu umanu 650”, dehan Provedór Silvério Pinto Baptista, iha Salaun Ministériu Solidariedade Sosiál (MSS), horisehik.

Husi totál kazu ne’e, metade prosesa ona, maibé iha mós balun mak rekomenda ba entidade sira hanesan F-FDTL, PNTL no ministériu sira ne'ebé liga ho kazu, kuaze sira fó resposta.

Instituisaun Estadu ne’ebé la hetan resposta eskrita PDHJ tuir sira nia prosedimentu interna iha enkontru auto-nivel entre provedór no adjuntu na’in rua hodi haree medida saida mak ministériu relevante simu no rekomendasaun hodi implementa.

Selebrasaun Aniversáriu ho Palestra Fundu Petrolíferu

Nune’e, iha selebrasaun aniversáriu PDHJ nian, instituisaun independente ne’e halo ho serimónia palestra kona-ba importánsia governasaun di'ak no fundu petrolíferu.

Meius ne’e hala'o hodi fahe informasaun ba foin-sa'e sira, tanba iha serimónia ne’e mós konvida estudante universitáriu sira.

“Ita tenke hatene fundu mina rai ho merkadu ne'ebé agora daudaun akontese ho ita nia rendimentu tinan-tinan la aumenta. Tanba ne’e, liu husi semináriu ne’e atu loke ita hotu nia hanoin oinsá atu halo jestaun ne’ebé di’ak ho boa governasaun,” tenik nia.

Tanba, fundu mina-rai la’ós uza ba agora de’it, maibé ba futuru no jerasaun tuir mai sira nia direitu.

Iha fatin hanesan, Vise Prezidente Komisaun A Parlamentu Nasionál, deputadu Arão Noe de Jesus hateten, knaar PDHJ nian importante tebes ba Estadu ida ne’e atu defende no proteje ema nia diretu ho governasaun di'ak no efikásia.

Nia dehan, instituisaun ne’e atu defende liu-liu ema kbiit laek sira nia direitu ne'ebé hetan abuzu podér.