Ministru Prezidensiá Konsellu Ministru (MPKM) Fidelis Manuel Leite Magalhães hatete, diploma ne’e ho objetivu atu inkorpora iha Lei Eleitorál ba Parlamentu Nasionál inovasaun sira ne’ebé introdús ona iha tinan 2021 iha Lei Eleitorál ba Prezidente Repúblika, hodi garante armonizasaun lejizlativa ida ne’ebé boot liu entre lei reguladora sira iha eleisaun órgaun soberania sira ne’e.
Nune’e hakarak introdús medida foun hodi aumenta partisipasaun demokrátika sidadaun Timoroan sira ne’ebé hela iha rai-li’ur, liuliu introdusaun ba votu postál ka alargamentu oráriu funsionamentu estasaun votu, matéria ne’ebé ninia regulasaun ne’e bazeia ba determinasaun konstitusionál, hanesan rezerva lejizlativa.
"Konsellu Ministru mós aprova proposta husi ministeriu Estatal aprezenta husi vise Ministru Administrasaun Estatal kona-ba alterasaun dalima ba lei númeru 6/2016 Loron 28 fulan Dezembru ne'ebé aprova lei eleitoral ba Parlamentu Nasionál, nia objetivu mak atu fasilita katak Timor oan sira hela iha rai li'ur hirak ne'ebé mak hela dok husi ita ninia Diplomata nia instituisaun Diplomata sira bele vota liu husi Postal," dehan nia iha Palasiu Governu, kuarta ne’e (11/01).
Nia hatutan, alterasaun ida ne'e, alterasaun resente ida bainhira protesta alterasaun anterior sira ba ona iha Parlamentu Nasionál.
“Entaun saida mak sei akontese hafoin aprovasaun ohin sei haruka ba Parlamentu Nasionál atu tetu ida ne'e substitui fali testu ida ne'ebé mak iha Parlamentu Nasionál,”tenik nia.
Governante ne’e dehan, ida ne'e rezultadu husi diskusaun naruk ne'ebé Prezidente Repúblika halo ho Primeiru Ministru, atu haree liu-liu oinsá atu bele responde ba iha preokupasaun sira ne'ebé komunidade Timor oan iha rai li'ur infrenta.
"Barak iha rai li'ur sira infrenta dezafiu sira hakarak vota liu-liu orariu traballu ne'ebé la hanesan no karik iha difikuldade sira seluk tanba loron mak la permite sira atu ba, tanba loron ne'ebé ita halo eleisaun iha ne'e, iha ne’ebá dala ruma monu iha loron servisu sira nian," haktuir nia.
Tan ne’e, atu fasilita Timor oan sira iha rai liur mak, Governu buka meius ida atu fasilita sira liu husi votasaun postal.
