Inisiativa ida-ne’e, ho apoiu husi Programa Ai-han Mundiál (WFP) nu’udar ninia Sekretariadu, iha objetivu atu alkansa progresu sustentável ba Objetivu Dezenvolvimentu Sustentável 2 (Hamlaha Zero ).

Forsa Tarefa Globál ne’e sei foka liuliu ba nasaun sira ne'ebé frajil no menus dezenvolvidu liuhosi fasilita troka koñesimentu no kolaborasaun entre nasaun sira.

Nasaun sira sei fahe prátika di’ak liu, solusaun inovadora, no lisaun sira-ne’ebé aprende ona iha implementasaun programa protesaun sosiál sira. Reprezentante sira hosi nasaun oioin, inklui Sekretáriu-Jerál no Reprezentante aas ba Nasaun Menus Dezenvolvidu sira, Repúblika Dominikana, Nepál, Katár, no Tanzánia, partisipa iha serimónia lansamentu.

Eventu ida-ne'e halo parte iha ajenda sekundária hosi Fórum Polítiku Nivel Aas anuál iha Nova Iorke, ne'ebé fornese plataforma ida hodi konvida nasaun sira atu kria no hola-parte hamutuk iha konvokatóriu ba asaun hosi Forsa Tarefa Globál.

“Protesaun sosiál hanesan estratéjia ida-ne’ebé prova ona hodi kombate ki’ak no hamlaha liuhosi hadi’a rezultadu sira Seguransa Ai-han no Nutrisaun nian, partikularmente iha nasaun sira-ne’ebé frajil no menus dezenvolvidu,” dehan Jose Ramos-Horta, Prezidente Timor-Leste, iha deklarasaun vídeo iha abertura eventu nian.

Durante nia diskursu, Embaixadór Dionisio Babo Soares, Reprezentante Permanente Timor-Leste iha Nasoens Unidas, hatutan, “Ita presiza programa dezenvolvimentu sosiál ne’ebé la’ós hakonu de’it kabun maibé fuan, isin, no espíritu sira liuhosi nutrisaun ne’ebé di’ak. Ami imajina era foun ida iha-ne'ebé sistema protesaun sosiál sira maka metin, efetivu, no inkluzivu, hodi garante katak laiha ema ida maka husik hela iha kotuk.” Embaixadora Paula Narvaez, Reprezentante Permanente Xile nian iha Nasoins Unidas, reafirma Xile nia kompromisu hodi dezenvolve polítika protesaun sosiál: "Ami nia esforsu sira foka ba avansu protesaun sosiál liuhosi enkuadramentu direitus umanus no perspetiva jéneru nian, rekoñese ninia papél sentrál iha promosaun estabilidade polítika, haburas dezenvolvimentu sosiál, no hadi'a saúde públika no moris-di'ak."

Forsa Tarefa Globál hakarak atu apoia esforsu globál sira ne'ebé luan liu atu avansa dezenvolvimentu inkluzivu no sustentável tuir Ajenda 2030 nian. Ida-ne'e hatán ba apelu sira ne'ebé Sekretáriu-Jerál ONU nian halo hosi relatóriu “Ita-nia Ajenda Komún” ba era foun protesaun sosiál universál nian.