Akordu dahuluk ne’ebé asina mak Izensaun Obrigasaun Vistu ba Pasaporte Titulares Diplomátiku no Ofisiál ne’ebé asina husi Ministru Negósiu Estranjeiru no Kooperasaun Timor-Leste, Bendito dos Santos Freitas, ho Embaixadór Extraordináriu no Plenipotensiáriu Repúblika Índia, Sandeep Chakravorty.
Akordu daruak mak Memorandu Entendimentu kona-bá Programa Interkâmbiu Kulturál entre Governu Timor-Leste ho Governu Repúblika Índia ba tinan 2024-2028, ne’ebé assina husi Sekretáriu Estadu Arte no Kultura, Jorge Soares Cristovão ho Embaixadór Extraordináriu no Plenipotensiáriu Repúblika Índia, Sandeep Chakravorty.
Akordu datoluk mak Memorandu Entendimentu ba Kooperasaun no Kolaborasaun kona-bá Radiodifuzaun entre Rádiu no Televizaun Timor-Leste (RTTL) ho Prasar Bharati, Índia (Broadcasting Corporation of India) ne’ebé asina husi Embaixadór Extraordináriu no Plenipotensiáriu Repúblika Índia, Sandeep Chakravorty, ho Prezidente Konsellu Administrasaun RTTL, José António Belo ‘Taraleu’.
Molok ne’e, Timor-Leste estabelese ona kooperasaun iha área estratéjiku sira mak hanesan; edukasaun, saúde, agrikultura no seluk tán.
Vizita ofisiál ne’e, hanesan vizita dahuluk Xefe Estadu Índia nian mai TL no vizita ida ne’e hanesan parte ida husi ajenda vizita Prezidente Índia iha rejiaun pasífiku inklui nasaun Fiji ho Nova Zelándia.
Durante enkontru ASEAN India ne’ebé hala’o iha ámbitu simeira ASEAN bá dala-43 iha Setembru tinan kotuk, Primeiru-Ministru Índia Narendra Modi anunsia desizaun atu estabelese embaixada Índia iha Díli.
Deklarasaun ofisiál ne’ebé publika iha pájina ofisiál Ministériu Negósiu Estranjeiru Índia hateten katak, desizaun ne’e refleta importánsia husi relasaun amizade entre Índia ASEAN ho Timor-Leste.
Hametin relasaun TL-India
Prezidente Repúblika, José Ramos deklara, vizita dahuluk Prezidente Índia, Droupadi Murmu, mai TL atu hametin relasaun entre nasaun rua.
"Ohin iha Dili ba Vizita Estadu ida ne’ebé markante durante loron rua, ida ne'e marka vizita dahuluk hosi Xefe Estadu indiana ida ba Timor-Leste, hodi subliña hametin relasaun sira entre nasaun rua ne'e. Líder sira envolve iha diskusaun sira ne'ebé hó fuan, hodi trasa roteiru ida ba kolaborasaun iha futuru iha setór krítiku sira inklui teknolójia, agrikultura, saúde, defeza, infraestrutura, no edukasaun. Akordu xave oi-oin asina ona durante vizita, liu-liu akordu izensaun vistu nian ba pasaporte diplomátiku no servisu nian no programa interkámbiu kulturál ida, hodi hametin liután relasaun bilaterál sira," dehan PR Horta liu husi konferensia imprensa konjuntu iha Palásiu Prezidensiál Bairu-Pite, Sábadu (10/08).
Nune'e, nasaun rua Timor Leste no India hahú husi loron ida iha independénsia tinan 2002 dezenvolve ona bilaterál ida ne'ebé forte, relasaun diplomátika ne'ebé forte, área kooperasaun sira hala'o tiha ona iha tinan hirak ne'e.
"Ho ha'u nia vizita iha fulan Janeiru Gujarat bainhira ha'u hasoru malu ho Prezidente Índia ho abertura ba Embaixada Índia ida iha Dili lakleur tan sei habelar liután relasaun ida ne'e iha área sira hanesan agrikultura, edukasaun saúde, dijitalizasaun, liu-liu iha ita nia sistema no ho ita nia Banku Sentral no ita nia servisu públiku, nune'e Índia bele ajuda Timor Leste to'o iha sékulu 21," dehan PR Horta.
PR Horta dehan, iha valór komún ida hanoin komún kona-ba asuntu internasionál barak inklui kona-ba instituisaun multilaterál sira oinsá atu reforma no instituisaun multilaterál sira atu benefisia mundu no atu haforsa, pás no seguransa iha mundu.
"Ha'u agradese tan ba ita boot nia m tanba uza tempu atu mai vizita ami. Ita boot sira iha ne'e iha priviléjiu boot ida atu fó onra boot ba ita boot sira," hakotu PR Horta.
Prezidente Índia, Droupadi Murmu reafirma apoiu maka'as Índia nian ba Timor-Leste nia adezaun ba ASEAN iha tinan 2025 no kongratula nasaun ba nia aseitasaun foin lalais ne'e iha Organizasaun Mundiál Komérsiu nian.
Nia dehan, importánsia husi diálogu no adezaun ba lei internasionál hodi haburas dame rejionál no globál, tanba Prezidente Repúblika José Ramos Horta, hatudu Timor Leste nia apoiu ba kandidatura Índia nian ba adezaun permanente iha Konsellu Seguransa ONU nian.
Nia hatete, nasaun rua ne'e kompromete ona atu harii embaixada sira iha ida-idak nia kapitál sira, hodi loke dalan ba relasaun diplomátiku sira ne'ebé di'ak liután. Nune'e enkontru istóriku ida ne'e hein atu sai hanesan pasu importante ida ba parseria ida ne'ebé metin liután entre Timor Leste no Índia iha tinan hirak tuir mai.
"Ha'u kontente atu mai iha Dili Timor Leste, ne'e mak loron dahuluk ne'ebé ami halo husi India to'o Timor Leste. Ha'u ho ha'u nia delegasaun simu tebes servisu iha resepsaun no ospitalidade laran luak ne'ebé Prezidente Repúblika José Ramos Horta no povu Timor Leste simu ba ami. Ha'u lori parabéns husi povu India ba povu amigavel Timor Leste. India no Timor Leste iha relasaun di'ak no amigavel bazeia ba ita nia kompromisu atu fahe ba valór demokrásia no relijiaun nian. Ha'u fiar katak ida ne'e sei hametin liután relasaun bilaterál entre nasaun rua ne'e. Ha'u sente onra boot tebes simu medalla colar Timor Leste nian, ida ne'e hanesan refleksaun ida husi relasaun amizade entre India no Timor Leste," dehan Prezidente Índiana Droupadi Murmu.
Prezidente Índiana esplika, nia ho Prezidente Repúblika José Ramos Horta diskute maka'as kona-ba kooperasaun entre India no Timor Leste iha área IT, teknolójia dijitál saúde no farmasek sira kapasitasaun agrikultura no seluk tan.
Nune'e mós durante sira nia enkontru sira ko'alia kona-ba posibilidade Timor Leste nian hamutuk ho aliansa solár internasionál no mós ho koligasaun estudu dijitál no infraestrutura sira organizasaun internasionál sira ne'ebé iha sede India.
Nia afirma, durante Prezidente Índiana nia vizita sei hasoru malu ho Primeiru Ministru Kay Rala Xanana Gusmão, primeiru kona-ba troka kulturál, segundu kona-ba kolaborasaun entre Timor Leste rádiu no televizaun iha área transmisaun rádiu no terseiru kona-ba esepsaun husi rekizitu vistu ba ema hotu ne'ebé iha pasaporte ofisiál diplomátiku no servisu.
"Ha'u mós kontente tanba lakleur tan India sei loke fatin misaun rezidente ida iha Dili, ami mós hein atu Timor Leste loke nia misaun rezidente iha Nova Dili. Ha'u hakarak asegura katak, ligasaun Dili sei sai forte liu tan iha tempu atu mai, molok ha'u remata dala ida tan, ha'u agradese ba governu no povu Timor Leste tanba ita boot sira nia hospitalidade ne'ebé di'ak no kondena ha'u nia hakarak di'ak liu ba progresu no prosperidade povu Timor Leste nian," tenik nia.
