Workshop ne’e partisipa husi ekipa multi-sektorál ne'ebé responsanvél ba violensia bazeia ba jeneru ho tema “hametin sistema rede referál no jestaun kazu ba violensia bazeia ba jenéru iha Timor-Leste”.
Sekretariu Estadu Igualdade (SEI), Elvina Sousa Carvalho hatete, governu nia parte atu fó advokásia, no Fundus Nasoens Unidas Apoia Populasaun, ne’ebé apoiu APAV nia misaun atu analiza ba Timor-Leste nia sistema referál no haree sistema TL ne’ebé atu fó resposta ba vítima husi violensia bazeia ba jéneru.
“Sira-nia prezensa klaru ké sei mai apoiu ita hodi bele dezenvolve di’ak liu tán ita-nia sistema apoiu vítima, tanba APAV iha ona esperiénsia tinan naruk ona haree ba vítima sira no mós fó suporta ba vítima sira banhira hetan violensia bazeia ba jéneru,” dehan nia iha Otél Timor, Kolmera (19/01).
Governante ne’e afirma, bazeia ba planu asaun nasionál bazeia ba jéneru ne’e fo importánsia ba SEI atu bele servisu maka’as iha prevensaun VBJ, no sei apoiu mos linha sektoral, ne’ebé durante ne’e apoiu vítima sira.
Elvina esplika, vítima husi VBJ presiza sentru ne’ebé atensaun, no resposta edekuadu ba sira-nia problema, tanba ne’e ita sei rona APAV nia espriénsia ne’ebé suporta ona vitima sira.
Iha fatin hanesan, Reprezentante UNFPA iha TL, Pressia Arifin Cabo hatete, husi workshop ne’e nia objetivu atu identifika lakunas sira ne’ebé iha sistema jestaun kazu VBJ no sistema apoiu vítima nian.
Nia dehan, defaktu hatudu katak linhas Ministeriais hanesan Ministeriu Solidarieda Sosial no Inkluzaun (MSSI), Ministeriu Saúde (MS), Ministeriu Justisa (MJ) no Sosiedade Sivil sira mos barak mak servsiu hodi apoiu ba vítima sira.
“entau defaktu agora ita iha linha Ministeriais barak servisu atu fo apoia ba vitima tan ne’e presiza iha kordenasaun no interasaun ida ne’ebé di’ak entre setór hotu-hotu atu asegura katak vítima mak sai sentru ba apoiu sira hotu no nia nesesidade mak sai sentru ba intervensaun hotu-hotu,” dehan reprezentante UNFPA.
Iha biban ne’e mos, Diretór Jerál-MSSI, Florêncio Pina Dias Gonzaga hato’o agradese ba UNFPA no APAV ne’ebé kontinua apoiu asuntu VBJ, no hein katak bele servisu hamutuk ho vítima sira.