Diretór Jeral SEFOPE, Carlito Rosário Cabral hatete, traballadór hirak ne’e prepara ona sira nia an didiak, atu aranka ba Australia hafoin SEFOPE sei fó sai desisaun formal iha tempu badak iha Fevereiru nia laran.

Serimónia despedida ba traballadór Timoroan na’in 85. ne'ebe kompostu husi traballadór tuan 40 no foun 45 ne'ebe agora dadaun prepara ona.

"Imi na’in 85 pesoas tenki kumpri konteúdu kontratu entre imi nu’udar parte traballadór no empregador ka Kompaña," dehan nia ba jornalista sira iha salaun SEFOPE, Kaikoli, Dili, (18/01).

Diretór ne’e salienta, fiar katak programa servisu tuir tempu ka seasional work ne'e bele la’o ho efetivu no efikás liu tan, ho rezultadu ne'ebé parte hotu bele hetan vantajen husi programa seasional work services iha Australia.

Maibe nia espera katak husi parte indikadór sira hotu bele fo kontribusaun indireita ou direita no servisu no hamutuk hodi halo programa servisu refere hetan susesu boot liu tan.

Iha biban ne’e, nia mós enkoraja traballadór sira hotu atu kumpri nafatin lei traballadór sira nian iha Austrália.

“Imi nia presensa iha Australia imi hotu sai ema ne'ebé konsiente hodi kumpri kualker lei ne'ebé aplikavel iha Australia hodi garantia imi nia servisu la’o diak nafatin too imi nia kontratu remata, entaun imi hetan dezempeñu servisu ne'ebé diak husi imi nia servisu durante iha Australia,” nia relata.

Iha fatin hanesan, Diretor Nasional ba Exteriór Estranjeiru, João Coreia Pereira hatete, opsaun diak liu ba traballadór sira mak buka meus atu adapta ambiente servisu ne'ebé iha kompañia hotu no tau konsensia hodi aprende buat hirak ne'e.

“Konserteza ita sei hetan ninia vantajen tuir ita nia estandar moris ekonomia iha ita nia rai Timor-Leste, tanba imi hotu nia servisu diak sei sai modalidade ba ita nia dezenvolvimentu nasional,” afirma nia.