Presidenti CMTL Elio de Jesus Gomes hateten, asina nota koperasaun entre ajensia no empreza ne’e kona ba fornesimentu servisu sira, liliu ba aspetu informasaun no teknolojia.

"CMTL hanesan empreza estatal ne'ebé kria husi  Governu liu husi dekretu lei N.42/2022 ne'ebé ho objetivu atu halo atividades komérsial iha setór rekursus pideirus nian, tanba ida ne'e mak CMTL nia papel,” dehan nia iha, edifisiu CAMTL, Hudi Laran, kuarta ne’e (14/12).

Iha fatin hanesan, Diretór Ezekutivu TIC Timor, IP, Roberto C.de Sousa Vicente hateten, objetivu husi asina akordu ida ne'e, atu apoiu nesesidade CMTL nia iha área informatika nian.

“Por ezemplu iha nesesidade prátika atu kria sira nia baze de dadus hanesan kria website no konetividade sira seluk, atu tulun sira bele hala'o sira nia atividade diak liu no aumesmu tempo fahe mós informasaun ba publiku kona ba servisu CMTL S.A nian," nia dehan.

Ezekutivu ne’e hatutan, dala barak iha instituisaun estadu iha atividade barak, tan ne’e limita mós sira atu fahe informasaun ba públiku, entaun ho koperasaun hanesan ne'e, bele desenvolve liu tan sira nia nesesidade iha área informatika atu públiku bele asesu informasaun diak liu tan.

Entretantu, CMTL fó ona apoiu ba instituisaun estadu kuaze 98 ne'ebé lokaliza iha nivel sentral to'o ba iha munisipiu.