“Muzeu Nasionál sei responsavel hodi estuda no investiga, inkorpora, inventaria no dokumenta, konzerva, garante seguransa, interpreta, espor no eduka relativa ho sasan kultura sira ne’ebé reprezenta testamuña materiál ho valór sivilizasaun ka kultura timór nian,”dehan Ministru Prezidensial Konsellu Ministru, Fidelis Leite Magalhães, iha komunikadu ne’ebé Online INDEPENDENETE asesu, kuarta (14/12).

Governante ne’e hatutan, Institutu Públiku ne’e tenke promove espozisaun sasan kiltura sira ne’ebé hamutuk ona iha aservu Muzeum Nasionál no entidade sira seluk, públika ka provada, nasionál ka internasionál.

Nia haktuir, ida ne’e mós tenke promove funsaun edukativa ne’ebé respeita ba diversidade kulturál, ho objetivu ba edukasaun permanente, partisipasaun komunidade no aumentu diversifikasaun públiku sira nian.

Entretantu, ne’e mós iha kompeténsia hodi promove direitu ba kultura no ba fruisaun kulturál, no mós promosaun, difuzaun no valorizasaun patrimóniu kulturál Timor-Leste, ba nivel nasionál no internasionál.