“Objetivu husi diploma ne’e, iha ámbitu reforma jestaun finansas públikas nian ne’ebé daudaun ne’e lao hela, atu aumenta kapasidade jestaun no autonomia téknika no administrativa autoridade estatístika nasionál, ne’ebé transforma Diresaun-Jerál Estatístika iha Institutu Nasionál Estatístika Timor-Leste hodi hadi’a kualidade, imparsialidade no konfiansa iha estatístika ofisiál sira Estadu nian,” dehan Ministru Prezidensial Konsellu Ministru, Fidelis Leite Magalhães, iha komunikadu ne’ebé Online INDEPENDENETE asesu, kuarta (14/12).
Governante ne’e hatutan, INETL sei sai ema koletiva públika ida, ho forma institutu públiku, ne’ebé integra iha administrasaun indireta Estadu nian, iha ámbitu Ministériu Finansas nian, dota ona autonomia téknika, administrativa, finanseira, no patrimóniu rasik.
Entretantu, Institutu Públiku ida-ne’e sei assume knaar nu’udar autoridade estatístika nasionál no ninia misaun mak atu halo dezeñu, koordenasaun no produsaun ba estatístika ofisiál sira Estadu nian.
