“Agora hein lai tanba husu tiha ona husi Tribunal Rekursu para haree aspetu konstituisional. Ha’u hakarak iha tempu badak antes iha natal promulga, ne’e labele atraza,”dehan nia iha Sala VIP Aeroporto Internasional Nikolau Lobato, tersa ne’e (13/12).
PR hatutan, atu nune’e iha loron 1 fulan-Janeiru tinan 2023, orsamentu hotu pronto ona atu Governu ezekuta nia mandatu ba nia programa sira.
“Portantu, ita tama ona ba direita final ba eleisaun foun, ha’u lakohi halo aktu prezidensia ruma ké depois bele tau tan no aumenta tan difikuldade ba Governu ezekuta nia knar kona ekonomia no buat sira ne’e, ita haree estudus mais iha 2023 iha rekuperasaun ekonomia diak. Entaun sei iha klaru aspetu balun konstituisional ne’e ha’u labele asina no labele duni viola konstituisaun,”tenik Xefe Estadu.
Entretantu, molok ne’e, iha loron 17 fulan-Novembru Parlamentu Nasional promulga ona proposta lei númeru 46/V (5a), Orsamentu Jeral Estadu tinan 2023 ho montante dolar amerikanu biliaun $3,16, iha final global ho votu a-favor 42, kontra 21 no abstensaun 2.
Enkuantu, OJE 2023 ho montante dolar amerikanu billaun $3,16, kompostu husi Orsamentu Administrasaun Sentrál billaun $2,8 (inklui ona Fundu Kombatentes Libertasaun Nasionál, billaun $1), Orsamentu ba Seguransa Sosiál millaun $235,7 no ba RAEOA millaun $120.
