Diretór Servisu Edukasaun Munisípiu Dili, Sabino da Costa Pereira hateten, iha fulan ida-ne'e Governu hahú implementa merenda eskolár ba eskola públiku 60 no eskola privadu inklui katólika hamutuk 40.
“Loos duni katak ita seidauk implementa merenda eskolár, maibé tanba dadus ne'ebé mak ita-nia Diretór no Koordenadór Eskola sira mak seidauk entrega hotu no foin mak entrega hotu iha semana kotuk, entaun presiza haree hodi agrupa,” Dehan Diretór Servisu Edukasaun Munisípiu Dili, Sabino, iha nia knaar fatin, Komoro, Sesta (8/03).
Dirijente ne'e hateten, dadus ne'ebé sira forñese mai ne'e sempre aumenta, entaun atrazu hodi difikulta prosesu implementasaun.
“Estudante balun foin mak rejistu no iha balun ne'ebé sai fali, entaun ho hirak-ne'e hotu mak atraza ba implementasaun ne'e. Nune'e ha'u hasoru ona Diretór sira no konfirma ona sira atu lori dadus ba. Nune'e segunda ita lori dadus ba hatama ona para iha fulan ne'e ita bele implementa ona,” Nia hatete.
Nia hatutan, iha Munisípiu Dili ne'e Eskola katólika ho privadu sira mós sei asesu ba merenda eskolár, nune'e iha tinan ne'e iha eskola 40 husi Katólika no privadu mak sei asesu, entaun seidauk bele fó sai ba públiku, tanba dadus foin tama hotu entaun presiza agrupa tiha lai.
Purtantu, Eskola katólika ne'ebé asesu ba merenda eskolár mak Eskola São José Operáriu, São Francisco Dare, Cristal no seluk tan, tanba merenda eskolár ne'e kobre pre-eskolár to'o terseiru siklu.
Entretantu Eskola privadu ne'e mak Eskola Bázika Anur, Raina da Paz, Nobel da Páz, inklui pre-eskolár privada iha Munisípiu Dili nian, maibé to'o agora grupu ekipa jestaun programa (EJP) seidauk iha, entaun presiza halo koordenasaun ho sira, tanba liga ho distánsia no ida-ne'e Munisípiu Dili mak kria grupu EJP ne'e.
Iha tinan kotuk, iha grupu EJP hamutuk 17 ne'ebé kobre eskola 60-resin, nune'e ba tinan ne'e parte relevante sei buka tan grupu EJP ba eskola 40.
Grupu EJP ba eskola 40 ne'e, ME koordena ona ho eskola refere hodi kria ona tanba kuandu implementa merenda eskolár ne'e presiza konta bankária grupu ne'e ni’an.
Purtantu Pre-eskolár iha eskola 55, Ensinu Báziku públiku 60, privada ho Katólika 37, Sekundáriu jerál 23, Tékniku vokasionál iha 8.
