“Apresia ho joventude sira nia hanoin furak ida-ne'e hodi harii asosiasaun prevensaun droga iha Timor-Leste, no husu ita-boot sira atu kontinua nafatin halo kordenasaun ho MJDAK,” Dehan Ministru Nelio Isaac hafoin hasoru malu ho Juventude sira ne'ebé harii ADPTL, iha Lesidere, Sesta (08/03).
Purtantu, juventude ne'ebé harii ADPTL ne’e, iha tinan kotuk , Polisia Nasionál Timor-Leste (PNTL) hetan konvite ida husi Thailandia hodi konvida juventude na’in haat reprezenta Timor-Leste, atu ba tuir atividade prevensaun droga ni’an. Nune'e MJDAK hanesan parseiru mós ba PNTL, entaun MJDAK halo selesaun no apoiu joven na’in haat, reprezenta juventude Timor-Leste durante loron 10, iha thailandia hodi tuir formasaun kona ba prevensaun droga nian.
Iha fatin hanesan, joventude ida ne'ebé harii ADPTL, Jaimitu Sequeira Gusmão reforsa, iha Timor-Leste seidauk iha organizasaun independente ida-ne'ebé servisu foku ba asuntu prevensaun droga, tanba ne'e mak sira harii asosiasaun refere hodi bele reforsa lei kombate droga.
“Iha Timor-Leste ita seidauk iha organizasaun independente ida-ne’ebé nia servisu foku prinsipal de’it ba asuntu prevensaun Droga, ami hanoin ida-ne’e mak ami harii asosiasaun ida ne’e ho naran ADPTL. Ami nia programa mak halo advokásia no monitoring, hodi oinsa reforsa lei kombate droga, buka alternativu ida di’ak liu ba implementadór sira hanesan PNTL, atu sira bele halo servisu ne’ebe favorese liu,” Dehan nia.
Nia haktuir, asosiasaun foun ida ne’ebé foin estabelese, atu halo formasaun kampaña prevensaun sedu ba joven sira, hodi evita ba risku droga ne’ebé implika ba saúde, ekonómia no estabilidade.
Asosiasaun ne’e hari iha fin fulan-Outobru 2023, hafoin sira fila husi nasaun Thailandia. Tanba iha tinan kotuk, iha fim fulan-setembru PNTL hetan konvite ida husi Thailandia konvida juventude na’in haat reprezenta Timor-Leste ba tuir atividade prevensaun droga ni’an. Nune'e MJDAK hanesan parseiru mós ba PNTL, entaun halo selesaun hodi deside timor oan na’in haat mak ba partisipa.
“Nune'e ami iha hanoin furak ida hodi harii asosiasaun ida-ne'e ba saida mak ami aprende iha ne'ebá, tanba ami mós hetan mensajen pozitivu ida husi MJDAK maka husu am, atu kontinua ka sustentabilidade husi estudu vizita sira husi enkontru ne’ebé iha,”Nia hakotu.
