Ministra Saúde, Elia dos Reis Amaral hatete, fatin seguru iha sentru saúde internamentu hat ne'ebé atu lansa ne'e mak iha munisípiu Lautem, Baukau, Dili no kovalima hodi fo atendimentu kuidadu saúde ba vítima VBJ.
“Tempu badak Ministeriu Saúde ho INFPA sei lansa tan fatin seguru iha munisipiu 4, atu nune'e bele asegura kazu violénsia bazeia ba jéneru, tanba ita hatene katak feto barak mak terus hela iha silénsiu nia laran ho dezafiu ne’ebé sira hasoru hodi luta ba sira-nia direitu báziku no hasoru deskriminasaun, dizigualidade no violénsia bazeia jéneru,” Dehan Ministra Elia, iha salaun City 8, Sexta (08/03).
Ministra Elia dehan, Timor-Leste nasaun joven no hasoru dezafiu Violénsia Bazea Jenéru ne’ebé konsidera nu'udar violasaun ba direitu umanu no krize ba saúde públika, tanba estatistika hatudu violénsia bazeia jenéru afeta maka’as liu ba feto no labarik feto sira.
Nia hatutan, dadus Demografia no Saúde tinan 2016, hatudu iha Timor-Leste, feto ida husi feto na'in 3 ho idade tinan 15 até 49 mak sofre violénsia fiziku no seksuál iha silénsiu nia laran.
“Konsekuensia husi violénsia mak bele rezulta kanek todan, moras hada’et husi relasaun seksuál, isin-rua la planeadu, komplikasaun isin-rua, abortu no bele kauza mate. Situasaun ida-ne’e ejize setór saúde hadi'a prestasaun servisu ne’ebé seguru no konfidensialidade, atu fasilita profesionais saúde sira fó kuidadu bá sovrevivente sira,” Nia informa.
Tanba ne'e, Ministra rekoñese esforsu ne’ebe halo ona seidauk sufisiente ba 'sobrevivente sira. Maibé MS presiza halakon bareira sira iha fasilidade saúde hanesan atetude, komunikasaun, nune’e bele tulun sobrevivente sira hotu, liu-liu Ema ho defisiénsia, feto no labarik iha área rurál, komunidade LGBTIQ atu simu kuidadu saúde ho kualidade ne’ebé sira presiza.
Iha oportunidade ne’e, Ministra hato’o agradesementu ba parseiru sosiedade sivil no ajénsia UNFPA ne’ebé harii ona fasilidade, fó ona formasaun ba profesionais saúde sira, atu iha kapasidade identifika no fo atendimentu ba sobrevivente sira.
Iha fatin hanesan, Adjunta Reprejentante UNFPA, Domingas Bernardo informa, UNFPA no Ministeriu Saúde estabelese ona fatin seguru 4 iha sentru saúde internamentu Glenu iha munisípiu Ermera, sentru saúde internamentu Atabae iha munisípiu Bobonaro, sentru saúde internamentu Vikeke villa no sentru saúde internamentu Likisa.
“Ami nia apoiu ne’e pakote komprensivu, ami hadi'a fasilidade ajuda hamrik fatin seguru, fó treinamentu bá Profesioál saúde sira no tau ekipamentu no medikamentu esensiál, atu fasilita profesionais saúde sira servisu ho di’ak hodi forñese atendimentu ho kualidade tuir protokolu Ministeriu Saúde ni’an,” Nia hatete.
Nia informa, profesionais saúde ne’ebé treinadu ona hamutuk 258 no sira-ne’e hala’o servisu iha fatin seguru ne’ebé estabelesidu ona no sira-ne’ebé atu lansa iha tempu badak.
