"Hanesan ita bo’ot sira hatene, Dekretu Lei ba subsidiu ne'e Prezidente Repúblika, Francisco Guterres Lú Olo promulga ona, ne’e duni tempu badak governu komesa tau matan ba ida ne'e, ne’e duni sidadaun sira liu-liu transporte públiku sira lalika preokupa governu sei fó apoiu makas hodi bele minimiza prezu komustivel ne’ebé sa’e," dehan Taur Matan Ruak ba jornalista sira hafoin remata enkontru ho Xefi Estadu iha Palasiu Prezidensiál Bairu-Pite, (21/04).
Antes ne'e, tuir komunikadu imprensa ne'ebé jornál INDEPENDENTE asesu husi gabineti Prezidente Republika katak, iha loron 19 Abril 2022, Prezidente Repúblika, Francisco Guterres Lú Olo promulga ona Dekretu Lei Governu nian kona-ba atribuisaun subsídiu ba Operadores Transportes Rodoviariu Públiku, Aéreos, Marítimus Nasionais no Adkirentes Kombustivel ba Atividades Agríkula no Peska.
Dekretu lei ne’e rasik aprova iha Konsellu Ministru semana kotuk, nune’e bele responde preokupasaun públiku kona- ba folin kombustivel ne'ebé sa'e iha merkadu, tanba impaktu husi konflitu Ukrania-Rúsia.
Relasiona ho promulgasaun Dekretu Lei refere, sei fó kbiit ba Governu atu hahú implementa Dekretu refere iha tempu badak.
