Fulan Tolu, SSK Rejista Moras ISPA Hamutuk 16.898 Featured

By Gregorio da Costa Abril 21, 2022 621
Medíku Jéral SSK, Dra. Milena do Rego. Foto:Grigoriu/INDEPENDENTE. Medíku Jéral SSK, Dra. Milena do Rego. Foto:Grigoriu/INDEPENDENTE.

DILI: Iha fulan tolu nia laran, hahú husi janeiru to’o marsu 2022, Sentru Saúde Komoro (SSK) rejista moras Infesaun Respiratoriu Aguda (ISPA) hamutuk ema na’in 16.898.

Tuir Medíku Jéral SSK, Dra. Milena do Rego, hatete, iha fulan tolu nia laran, moras ne'ebé rejista aas liu iha Sentru Saúde Komoro ne’e mak, moras ISPA, tuir mai diarea no mós moras kulit.

Nia hatutan, aleinde, SSK rejista moras ISPA, rejista mós moras  diareia ho total hamutuk ema na’in 3.200 no moras kulit hamutuk ema na’in 2.063.

“Husi total númeru kazu hirak ne’e, seidauk halakon pasiente ida nia vida, tanba pasiente sira ne’e mai konsulta haree kondisaun la grave,”dehan nia ba Online INDEPENDENTE, iha knar fatin SSK, kinta ne’e (21/04).

Nia relata, iha fulan tolu, tinan ida ne'e, pasiente sira mai halo tratamentu iha Sentru Saúde Komoro barak liu, kompara ho tinan kotuk iha situasaun Covid-19 nian laran.

Entretantu, haree ba númeru kazu ne’ebé rejista aas, Mediku ne’e apela, ba komunidade sira ne’ebé bainhira senti moras no grave, isin manas, mear no hetan moras sira seluk, familia labele husik iha uma to’o loron tolu ka haat.

Maibé, lori lalais ba Sentru Saúde sira ne’ebé besik atu hetan tratamentu husi mediku sira. Tanba kazu mate ne'ebé iha dala barak sira ne'ebé mai tarde.

Aleinde, mediku ne’e, apela mós ba komunidade sira atu halo prevensaun iha uma, liu-liu hamoos baleta sira, uma ninin, evita soe fo’er arbiru no mós bainhira toba tenki uza muskiteriu, atu nune’e prevene moras sira ne’ebé fasil atu da’et no halakon ema nia vida.

Enkuantu, ba fasilidade no rekursu umanu, Mediku ne’e hatete, dadauk ne’e sufisiente hela atu halo atendementu ba pasiente sira.

Rate this item
(0 votes)

Independente Digital TV