“Ohin governu Timor-Leste liu-husi SEFOPE marka tán historia ida hodi haruka joven Timor-oan na’in hitu-nulu-resin-lima (75) ba servisu iha Korea Súl hodi bele hadi’a sira nia moris,”dehan Diretór DNEE, Filomeno Soares.
Nia hatutan, Timor-oan na’in 75 ne’e mane hotu, no sei ba servisu iha área fábrika ema na’in 41 no na’in 34 ba servisu iha área peskas.
Enkuantu, Diretór ne’e mós agadese ba Governu Korea Súl ne’ebé nafatin iha komitmentu simu Timor-oan sira ba servisu, hodi bele reduz númeru dezempregu iha nasaun Timor-Leste, no bele hasa’e kresimentu ekonomía nasaun.
Tanba ne’e, Jestór ba Diresaun ne’e, apela ba traballadór Timor-oan na’in 75 ne’ebé hetan ona oportunidade ne’e, atu hatudu komportamentu servisu ne’ebé di’ak, labele halai ses husi sistema, nune’e emprtegadór sira bele fó tán servisu ba joven Timor-oan sira ne’ebé he’in hela kampu servisu.
“Traballadór na’in 16 ne’ebé ba Australia servisu iha área agrikultura,”refere nota komunikadu Entretantu, Kandidatu traballadór Timor-oan na’in 16 ne’e, kompostu husi mane ualu (8) no feto ualu (8), sira ne’e hotu sei ba servisu iha Australia liu-husi programa SWP (Seasonal Worker Program) iha kompaña Connect Group.
Entretantu joven Timor-oan na’in 16 ne’e, sai husi Aeroportu Internasionál Prezidente Nikolau Lobatu Timor-Leste iha oras 08:30 hó aviaun Quantas no iha óras 10:30 maka tún iha Aeroportu Darwin Australia.
