Tuir Diretór Programa Edukasaun no Sidadania, Pe. Domingos Soares Maubere, hatete, ba eleitór sira labele falta hodi ezerse imi nia direitu votu iha eleisaun segundu volta ne’e.
“Husi biban ida ne’e mai husu ba sidadaun no sarani sira hotu tuir lia menon Amo Bispo sira nian, atu iha loron tersa aban (19/04), labele falta ba vota no vota ho konsensia, nuudar direitu no obrigasaun iha Maromak, Nasaun ho matebian sira nia oin,”dehan nia ba jornalista sira liu husi Konferensia Imprensa, iha Edifisiu Konferénsia Episkopál Timorense, Balide, segunda ne’e (18/04).
Nia hatutan, nuudar ema moris, hakarak moris iha hakmatek nia laran tuir Maromak nia hakarak.
Tanba ida ne’e mak, Maromak hakiak ema tuir dalan ne’ebé nia hatudu.
Nune’e, Maromak haruka nia oan mane mesak Jesus Kristu mai hatudu dalan foun no dalan domin ba sarani sira liu husi uma kreda.
“Igreja mai hanorin ita atu envolve aan iha polítika, hodi hala’o moris hamutuk ho Nasaun iha aspetu hotu-hotu, inklui hili governante sira. Tanba, ema hotu-hotu iha direitu no dever atu kontribui ho nia votu livre atu promove bem komum ka ema hotu-hotu nia di’ak,”esplika Pe. Maubere.
Nia haktuir, sidadaun hotu tenke hein atu CNE ho STAE hala’o sira nia knar ho kompeténsia, transparénsia no imparsialidade atu hotu-hotu bele partisipa iha eleisaun nuudar festa demokrasia nian.
“Ita-nia Nasaun ne’ebé ita tenke hadomi, hanesan grasa boot husi leten, maibé ita manan mós husi asswa’in rihun nia raan fakar no ruin naklekar iha Timor laran tomak ne’ebé ita tenke tane nafatin. Ita sei tane nafatin ita nia éroi sira, bainhira ita kontribui ba Nasaun ninia prosperiedade husi ita nia partisipasaaun ativa iha polítika hanesan ba vota iha eleisaun tuir ita nia Konstituisaun artigu 47 ho artigu 65 hatudu no fó dalan,”hakotu Pe. Domingos.
